Closed season sa panghuhuli ng galunggong sa Palawan ika-4 na taon na

Ipinatutupad muli ng Department of Agriculture Bureau of Fisheries and Aquatic Resources (DABFAR) ang pagbabawal sa panghuhuli ng isdang galunggong sa bahagi ng northeastern ng Palawan para sa mga commercial fishiers itong mga malalaking pamalakaya na gumagamit ng mga bangkang may sukat na 3.01 gross tons pataas .

Ito na ang ika-apat na taon nang pagpapatupad ng closed season ng isdang galunggong sa pamamagitan ng Joint Administrative Order No. 1 series of 2015 ng Department of Agriculture (DA) at ng Department of Interior and Local Government (DILG).

Sa press conference kamakailan ng InterAgency Task Force on the Conservation and Management of Roundscad Fisheries in Northern Palawan, inanunsiyo ni DA-BFAR Mimaropa Assist. Regional Director Roberto Abrera ang muling pagbabawal o closed season para sa panghuhuli ng nasabing isda.

Nagsimula ang tatlong buwang closed season sa isdang galunggong noong Nobyembre 1 at magtatapos ito sa Enero 31, 2019.

Layon nito na mabigyan ng pagkakataon ang mga galunggong na makapagparami. Ayon kay Myrna Candelario, hepe ng DA-Inland Sea Ranching Station, ang mga buwan kung saan ipinatutupad ang closed season ang panahon ng pangingitlog ng mga galunggong.

Sa pag-aaral ng DA-BFAR, sa loob ng tatlong taong implementasyon ng open at closed season sa isdang galunggong ay kinakitaan ng pagtaas ng maturity size ng nasabing isda mula 17.8 cm noong 2015-2016 sa 19.4 cm sa taong 20162017, bagama’t bumaba ito sa 18.8 cm nitong 2018 ay mas mataas pa rin ito kung ikukumpara sa maturity size nito sa unang taon ng pag-aaral. (OCJ/PIAMIMAROPA, Palawan)