Pamahalaang Panlalawigan namamahagi ng libreng solar home system units sa bayan ng Rizal
Nagpapatuloy ang pamamahagi ang Pamahalaang Panlalawigan ng mga bagong Solar Home System Units na sinimulan noong ika-9 ng buwan ng Nobyembre taong kasalukuyan sa munisipyo ng Rizal, Palawan.
Layon nito na makapagbigay ng pailaw sa mga malalayo at liblib na lugar sa lalawigan na hindi naaabot ng regular na serbisyo ng elektrisidad.
Ayon kay G. Rexie H. Aborot, Project Development Officer ng Energy Development Program, umaabot sa 2,467 units na mga bagong Solar Home System ang ipinamamahagi sa labing isang barangay ng naturang munisipyo.
Ito ay kinabibilangan ng Bgy. Bunog, Campong Ulay, Candawaga, Canipaan, Culasian, Iraan, Latud, Panalingaan, Punta Baja, Ransang at Taburi.
Ang mga benepisyaryo ay masusing dumaan sa berepikasyon na isinagawa ng Provincial Planning and Development Office (PPDO) at Energy Development Program ng Pamahalaang Panlalawigan upang matiyak na ang mga ito ay kwalipikado at hindi na mabibigyan muli ang mga nakatanggap na noong nakalipas na taon.
Ilan sa mga batayan ng pagpili ng mabibigyan ng Solar Home System units ay ang sumusunod: kinakailangan 400 metro ang layo ng tinitirhang tahanan mula sa powerline o poste ng kuryente. Nagkakaroon rin ng isang orientation bago ito ipinamamahagi nang sa ganun ay malaman ng mga benepisyaryo ang tamang paggamit nito.
Matatandaan 1, 717 Solar Home System units ang naipamahagi nitong nakalipas na buwan sa mga residente ng Brooke’s Point sa mga barangay ng Amas, Barong Barong, Maasin , Malis, Salogon, Samariňana at Saraza. Habang nasa 4,300 naman ang naibahagi na sa munisipyo ng Bataraza sa mga barangay ng. BonoBono, Bulalacao, Buliluyan, Culandanum, Igang-Igang, Inogbong, Malihud, Ocayan, Puring, Rio Tuba, Sandoval, Sapa, Sumbiling, Tabud, Tagnato, Tagolango, Taratak, Marangas, Malitub, Sarong, Iwahig at Tarusan.(PR)