Municipal 4H Club Federation ng Brooke’s Point, wagi bilang Outstanding Young Farmers Association sa rehiyong MIMAROPA
Wagi bilang outstanding young farmer organization sa rehiyong MIMAROPA ang 4H Club Municipal Federation of Brooke’s Point sa isinagawang 2018 Regional Gawad SAKA at Corn Achiever awarding ceremony ng Department of Agriculture noong ika-22 ng Nobyembre.
Ang nasabing organisasyon ay tumanggap ng premyong nagkakahalaga ng P75,000 at plake ng pagkilala.
Kabilang sa mga binigyan ng pagkilala ang mga assisting agricultural extension workers na naging kabalikat ng naturang organisasyon upang makamit ang parangal.
Sila ay kinabibilangan nina Provincial ISS Coordinator Ma. Mayla O. Rebusada ng pamahalaang panlalawigan ng Palawan, Municipal Agriculture Officer Renato Bacosa at Municipal 4H Club Coordinator Krist Joseph Cadlaon ng Brooke’s Point.
Ayon kay Gng. Rebusada, bahagi ng naging tagumpay ng organisasyon si Mayor Mary Jean Feleciano ng Brooke’s Point dahil sa suportang ibinibigay nito sa mga gawain, interbensyon at programang isinasagawa ng 4H Club Municipal Federation of Brooke’s Point.
Pinarangalan naman na Regional Corn Achiever sina G. Romeo Biobe Palao at G. Jerry Sotabinto ng Office of the Provincial Agriculturist (OPA) at Bb. Jaena Conales ng bayan ng Rizal. Kinilala rin sina Gng. Nenita Tabangay ng OPA at G. Antonio Gammad, Municipal agriculturist ng bayan ng Narra.
Ang Gawad SAKA ay taunang pagkilala ng Department of Agriculture sa mga natatanging indibidwal, magsasaka, mangingisda at rural-based organizations na may malaking kontribusyon sa sektor ng agrikultura.