Nursery ng niyog, planong itayo sa Bataraza, Palawan
Isinusulong ngayon ng Sangguniang Panlalawigan ng Palawan ang panukalang pagtatayo ng nursery ng niyog sa Barangay Buliluyan, bayan ng Bataraza.
Sa pamamagitan ng isang resolusyong iniakda ni bokal Winston Arzaga, hinimok nito ang Philippine Coconut Authority (PCA) at Department of Agriculture na isakatuparan ang proyekto at samahan pa ng programang ‘hybridization’.
Ayon kay Arzaga, magkakaloob ang pamahalaang panlalawigan ng lupang pagtatamnan sa Buliluyan na may lawak na 100 ektarya na gagamitin lamang para rito.
Akma rin aniya ang lugar sapagkat nandito ang ipinagawang daungan ng gobyerno kung saan maaaring i-byahe ang mga pananim na niyog at mailuwas saan mang bahagi.
Ipinaalala rin ng opisyal ang natalakay kamakailan sa idinaos na ‘coconut stakeholders’ summit’, kung saan iginiit ng punong ehekutibo ng Palawan ang pagtatayo ng national coconut seedling at seed garden sa nabanggit na barangay.
Sa ilalim ng panukala, nararapat aniya na tiyakin ng PCA ang suplay ng niyog sa hinaharap bunsod ng masigasig na na pagpapatupad ng mga programa na magpapalakas sa industriya ng niyog sa lalawigan.
Maliban sa planong pagpapalawak ng taniman ng niyog, isinusulong din ang pagkakaroon ng mga planta sa lalawigan para sa pag po-proseso ng produktong niyog bilang tulong ng pamahalaan sa mga magsasaka. (LBD/ PIAMIMAROPA-Palawan)