‘Science-based management plan’ sa PPSRNP, isinusulong
Hangad ng pamunuan ng Puerto Princesa Subterranean River National Park (PPSRNP) na magkaroon ng ‘science-based management plan’ sa taong 2019 bilang bahagi ng pagsisikap sa konserbasyon ng biodiversity nito.
Sinabi ni Jan Elmer Badilla, tagapagsalita ng PPSRNP sa pakikipagugnayan ng Philippine Information Agency, tiyak na magdudulot ng kabutihan sa pangangalaga sa underground river at iba pang bahagi nito nang walang kompromiso, kung maipatutupad ang panibagong plano ng pamamahala sa parke.
“May mga area at species tayo sa loob ng parke na kinakailangang hindi magalaw, kung ang dating management plan, hindi gaanong napo-protektahan, halimbawa ang fauna at iba pang species sa park, babaguhin ang mga iyon,” paliwanag ni Badilla.
Ayon kay Badilla, ang planong pinagbabatayan ng pamamahala ng parke sa kasalukuyan ay binuo noon pang 2002, kung saan hindi nakikita ang malaking pagbabago katulad na lamang ng pagdagsa ng maraming bisita sa pamosong kuweba matapos itong maisama sa ‘seven wonders of nature’.
Nagpahayag naman aniya ng suporta para rito ang Fauna and Flora International (FFI) sa pamamagitan ng biodiversity conservation specialist at country director nitong si Dr. Neil Aldrin Mallari na siyang makakatuwang ng pamunuan sa pagbuo nito.
“Sabi nga ni Dr. Mallari, nasa punto na ang Puerto Princesa na mapanumbalik ang forest cover, eh ang malaking bahaging nasasakop nito ang park (PPSRNP) kaya dapat mapangalagaan ng husto,” dagdag pa niya.
Sinabi pa ni Badilla na suportado ni Dr. Mallari ang pananaw na pagiging modelo ng PPSRNP sa mga protektadong lugar sa bansa sa pamamagitan ng science-based management kung ito ay maisasakatuparan.
“Sa science-based management kasi gagamitan yan ng advanced technology para ma-determine ang management zones and conservation target,”
Tiniyak naman ng pamunuan ng PPSRNP na dadaan sa mga konsultasyon ang pagpa-plano. Maging ang Protected Area Management Board (PAMB) at komunidad ay sasailalim din aniya sa workshop ukol dito. (LBD/PIAMIMAROPA-Palawan)