Pagawaan ng mga paputok, mahigpit na binabantayan ng DOLE
Isinasailalim sa mahigpit na pagbabantay ng Department of Labor and Employment ang mga pagawaan ng paputok sa bansa upang matiyak ang pagtalima ng mga ito sa Occupational Safety and Health Standards (OSHS).
Kaugnay ng pagdiriwang ng Pasko at Bagong Taon, inilabas ni Labor Secretary Silvestre H. Bello III ang Advisory No. 20, Series of 2018, na nag-aatas sa lahat ng regional directors [ng DOLE] na mahigpit na bantayan ang pagtupad ng mga establisyamento, partikular iyong nasa pagawaan ng paputok, alinsunod sa Republic Act No. 11058, o ang Occupational Safety and Health Standards (OSHS) upang maiwasan ang aksidente sa lugar-paggawa.
“Kaugnay ng pagdami ng pagawaan ng paputok sa buong bansa dahil sa pagdiriwang ng Kapaskuhan at Bagong Taon, inaatasan ang lahat ng Regional Directors na bantayan ang mga establisyamento sa kanilang pagtalima sa Republic Act no. 11058, OP Memo Order No. 31, s. 2018, Occupational Safety and Health Standards (OSHS) upang maiwasan ang anumang aksidente sa lugar-paggawa,” nakasaad sa panukala.
Nakapaloob din sa panukala na dapat tulungan ng mga labor laws compliance officer (LLCO) ang mga establisyamento sa pagtatama ng kanilang mga kakulangan upang makasunod sa OSHS.
Gayunpaman, kung sakaling hindi sumunod ang mga establisyamento sa patakaran, may karapatan ang labor inspector na magsagawa ng imbestigasyon sa paglabag alinsunod sa Department Order No. 183, series of 2017, o ang Revised Rules on the Administration and Enforcement of Labor Laws.
Samantala, inaasahan na ang lahat ng DOLE Regional Offices ay magsusumite sa Bureau of Working Conditions (BWC) ng listahan ng kanilang na-monitor at tinulungang establisyamento bukas, Disyembre 28. (PIA-NCR)