Ipatutupad na X-ray test, makabubuti sa mga manggagawa -- LGU San Jose
Malaking kapakinabangan sa mga manggagawa ang pagsasailalim sa kanila sa X-ray bilang karagdagang requirement ng Sanitation Division (SD), ayon sa pamahalaang bayan ng San Jose (LGU).
Sinabi ni Romie Dimaano, tagapamuno ng SD, ang resulta ng nasabing medical test ay mapapabilang sa mga isusumiteng dokumento sa kanilang tanggapan. “Isasabay nila ito sa kanilang aplikasyon ng Mayor’s Permit sa Enero ng 2019,” saad ni Dimaano. Dagdag pa nito, hindi bago ang kanilang paghingi ng X-ray test results sa mga manggagawa ng bawat establisiemento dahil nakasaad aniya ito sa Presidential Decree (PD) 856 (Sanitation Code of the Philippines).
“Sa pamamagitan ng direktiba ay mababantayan ang kalusugan ng mga manggagawa,“saad ni Dimaano. Aniya, malalaman kung ligtas ang mga ito (manggagawa) sa Tuberculosis (TB) o Pneumonia at maiiwasang maipasa ito sa mga mamimili.
Ayon pa kay Dimaano, oobligahin ng LGU ang lahat ng mamumuhunan na sumunod sa PD 856. “Upang matiyak na tatalima sila (mamumuhunan), hindi bibigyan ng mayor’s permit ang mga business establishments na walang X-ray results ang kanilang mga manggagawa” saad ni Dimaano. Paglilinaw pa nito, ang nasabing direktiba ay sasaklaw sa lahat ng uri ng negosyo (may unang aplikasyon o renewal ng mayor’s permit) na nasa bayan ng San Jose. “Maari silang makipagugnayan sa aming tanggapan sakaling meron silang katanungan,” ayon pa sa tagapamuno ng SD. Ang SD ay matatagpuan sa loob ng Municipal Health Building.