Brgy officials, pinaalalahanan na maging non-partisan
Inatasan ng pamunuan ng Department of the Interior and Local Government (DILG) - Romblon ang kanilang mga Field Officer na paalalahanan ang mga Barangay officials na dapat wala silang kinikilingan at huwag mangampanya pabor sa sinumang kandidato sa nasyonal man o sa lokal.
Ayon kay Premilie F. Solidum, LGOO II ng DILG - Romblon, nagsasagawa aniya ng regular na pagpupulong ang liga ng Municipal Local Government Operations Officer (MLGOO) at mga nasasakupan nilang barangay officials kung saan pinaalalahanan silang maging non-partisan.
Nauna na aniyang nagsabi si DILG Undersecretary for Barangay Affairs Martin Diño sa mga barangay officials na kung sakaling pumunta ang mga kandidato sa kanilang barangay ay dapat nilang tanggapin kahit sino pa man ito.
Ayon pa sa DILG, bawal mangampanya ang mga barangay officials batay na rin sa Sec. 389 ng R.A 7610 o ang Local Government Code sapagkat ang trabaho ng mga barangay officials ay ang magpasunod ng kabutihan ng barangay at pagpasunod ng batas at regulasyon.
Sa ginanap na Kapihan sa PIA, sinabi ni Solidum na kung sakaling may makita silang barangay officials na pumapabor sa isang kandidato, maaari aniya silang magsumbong sa Sangguniang Bayan, sa Department of the Interior and Local
Government o di kaya ay sa Office of the Ombudsman para masampahan ng kasong paglabag sa election code.
Kung wala aniyang dudulog sa mga nabanggit na opisina para magreklamo laban sa mga lumalabag sa election code ay tiyak na wala ring mapaparusahan.
Aminado si Solidum na lantaran na kung mangampanya ang mga barangay officials ngayong election period sa nasyonal man o sa lokal at ang mga senaryong ito ay hindi lingid sa kanilang kaalaman.
Dagdag pa ng opisyal, malinaw itong paglabag sa election code kaya muling pinaaalalahanan ang mga barangay opisyal na dapat iwasang mangampanya ng sinumang kandidato para hindi mabigyan ng penalidad o makasuhan ng DILG.