Lokal na produkto sa OccMin, masusubok sa Provincial Trade Fair 2019
Muling masusubok ang mga lokal na produkto sa lalawigan sa pagbubukas ng Agbiliwa Provincial Trade Fair 2019 (Agbiliwa) na matatagpuan sa municipal compound ng bayan ng San Jose.
Ayon kay Noel Flores, Department of Trade and Industry (DTI) Provincial Director, ang programang ito ng kanilang ahensya ay bilang suporta sa mga dati at nagsisimulang magnegosyo na makahanap ng mga mamimili at tagatangkilik.
“Taon-taon naming ginagaganap ito, dahil kailangan ng mga Micro Small and Medium Enterprises (MSMEs) ng exposure upang makilala,” pahayag ni Flores. Aniya, ang Agbiliwa ay unang bahagi ng mga trade fairs ng DTI. “Matapos ang local exposure, ang hangad ng ahensya ay madala sa regional at national trade fair ang ating mga produkto,” saad pa ng Provincial Director.
Ipinaliwanag ni Flores ang bentahe ng regional at national trade fairs. Aniya, sa nabanggit na mga trade fairs nakakakuha ng distributors, o mga kliyente na maramihan ang pagbili ng produkto, ang mga MSME.
“Kumita ng malaki ang Rich Blitz (sweet delicacies at pastries) at Ligad (Wood Arts) nang sumali ito sa 2018 Mimaropa Naturally (Regional Trade Fair),” ayon pa kay Flores.
Samantala, inaanyayahan naman ni Flores ang mga mamamayan ng lalawigan na bumisita sa Agbiliwa at ipakita ang suporta sa mga lokal na produkto. “Target nating kabuuang kita ngayong taon ay P1.2 milyon at tiwala akong kaya nating makuha ito,” ayon pa kay Flores.
Nagsimula ang Agbiliwa nitong ika-8 ng Abril at magtatapos sa ika-2 ng Mayo. (VND/PIA MIMAROPA/Occ Min)