Visual merchandizing and promotion seminar isinagawa sa kapitolyo

Bilang paghahanda para sa Palawan Marketing Expo Baragatan 2018 ay isang Seminar on Visual Merchandising and Promotion ang isinagawa kamakailan sa gusaling kapitolyo upang matulungan ang mga micro, small and medium enterprise ( MSME) sa buong lalawigan ng tamang pag-setup o pagaayos ng mga produkto sa local trade fairs. Ang nasabing aktibidad ay pinangunahan ng Department of Trade and Industry (DTI)Palawan katuwang ang Provincial Economic Enterprise Development Office (PEEDO) ng pamahalaang panlalawigan. Ayon kay Maylene B. Delliro, DTI Development Specialist, target nilang mapasama ang lahat ng mga exhibitors mula sa iba’t-ibang bayan ng lalawigan sa darating na Baragatan sa Palawan Trade Fair partikular na ang mga food processors. “Bawat munisipyo may mga booth yan ang gusto natin ay ma-highlight ang mga produkto para hindi lang ang isang lugar ang makikilala kundi kung anong brand din ng isang product kaya sa seminar na ito tuturuan sila ng mga tamang pagsetup ng mga products nila.” Pahayag ni Delliro. Nagsilibing tagapagsalita sa naturang pagsasanay si Gng. Bernadeth Maryan, Grand Marketer ng Activatek Consulting Inc. Kanyang tinalakay ang visual merchandising at mga paraan ng pagaayos ng mga paninda na makakatulong sa promosyon upang makilala ang isang produkto. Pinasalamatan naman ni Dr. Myrna O. Lacanilao,pinuno ng Provincial Economic Enterprise Development Office ang lahat ng mga dumalo sa gawain. Hinimok nito ang lahat ng mga nagsisimula pa lamang sa pagnenegosyo na maging matatag. “No quitting lahat ng obstacle dumadaan sa mahirap, darating ang panahon na maibebenta rin sa labas ng bansa ang inyong mga produkto.” bahagi ng mensahe ni Dr. Lacanilao. Ang gawain ay dinaluhan ng mga Micro, Small and Medium Enterprises mula sa mga munisipyo ng San Vicente, Bataraza, Narra, Sofronio Española, Roxas, Araceli, Brooke’s Point, Magsaysay at mga negosyante mula sa lungsod ng Puerto Princesa. Kabilanng sa dumalo ang mga operators ng souvenir shops, retail store, groceries stores, restaurant, food and beverages, bakeshops at iba pa. Bukod sa mga produktong handicrafts, food products, turmeric, rice coffee, pineapple, cashew, peanut butter at marami pang iba ay nais din palakasin ng DTI-Palawan ang mga produktong kakanin sa lalawigan ng Palawan.