Malaria monitoring sa mga barangay ng Rizal isinagawa ng Global Fund Organization
Bumisita sa lalawigan ng Palawan ang Global Fund upang magsagawa ng monitoring visit kaugnay sa pagpapatupad ng programa laban sa sakit na malaria. Ang mga barangay na binisita ay yaong may mataas na kaso ng malaria hanggang sa kasalukuyan sa bayan ng Rizal. Ang Global Fund ay isang institusyong pinansyal na nagbibigay ng malawakang suporta sa mga bansa upang labanan ang pagkalat ng mga pangunahing sakit na bumibiktima sa mga mahihirap na mamamayan. Ito ay isang pandaigdigang organisasyon na may pangunahing layunin na magbigay ng serbisyo patungkol sa pagiwas, paggamot at pangangalaga ng mga nakahahawang sakit tulad ng Tuberculosis, (TB), Human-Immunodeficiency Virus (HIV)Acquired Immune Deficiency Syndrome (AIDS) at Malaria. Prayoridad nito ang pagpapataas ng antas ng kaalaman sa kalusugan ng mga mamamayan sa buong daigdig partikular sa mga bansang kabilang sa third world countries. Ang naturang pagbisita ay pinangunahan ni Bb. 4i Cui, Country Portfolio Manager ng The Global Fund kasama ang iba pang kawani ng naturang organisasyon. Kasama sa grupo ang ilang kawani ng World Health Organization (WHO) na nakabase sa Pilipinas. Naroon din ang ilang kawani mula sa Department of Health (DOH)MIMAROPA gayundin ang kinatawan ng Pilipinas Shell Foundation Inc. (PSFI) sa pakikipagtulungan ng Provincial Health Office (PHO) at Kilusan Ligtas Malaria (KLM). Sa kanyang mensahe ay ibinahagi ni Bb. Cui na mayroong inilaan na mahigit sampung-milyong dolyares (USD10M) ang kanilang tanggapan para sa Pilipinas upang tulungan ang bansa sa implementasyon ng programa laban sa sakit na malaria. Nakapaloob sa tulong na ito ang pagbibigay ng mga commodities upang mas lalong mapaigting ang pagpapatupad nito sa mga lalawigan sa bansa lalo na sa Palawan. “We are very lucky na nakakuha tayo ng ka-partner, ang Global Fund who gave us a lot of funds para maibigay natin lahat ng needs ng Palawan including nets at kung ano pang tulong na pwedeng gawin,” ayon kay Marvi Trudeau, Executive Director ng PSFI Ayon pa sa kanya, tuloy-tuloy na ang paggulong ng programa sa pagsugpo ng malaria sa Palawan sa pamamagitan ng pagtutulungan ng iba’tibang ahensiya lalo’t higit ang presensya ng Kilusan Ligtas Malaria (KLM) ng pamahalaang panlalawigan. “We are really happy to say, although malaki pa ang kaso, napakababa na nito compared noong 1999 kung saan tayo nagsimula; mga 92 % na ang ating ibinaba, ito na ang pinakamababang kaso sa buong Pilipinas at Palawan nitong taong 2017,” dagdag ni Trudea Ayon naman kay G. Oscar Macam, Nurse V at Program Manager ng Vector-Borne Diseases ng DOH-MIMAROPA, ang lalawigan ng Palawan pa rin ang may malaking kontribusyon sa kaso ng malaria sa buong Pilipinas. Ito rin ang tanging lalawigan sa buong rehiyon ng MIMAROPA na nananatiling may kaso ng malaria. Aniya, mayroon nang naideklarang malariafree sa rehiyon, at ito ay ang mga lalawigan ng Marinduque at Romblon. Nakatakda rin maideklarang malariafree ang lalawigan ng Oriental at Occidental Mindoro pagkatapos na maisagawa ang assessment kaugnay nito. Nagpasalamat naman si Gng. Aileen B. Balderian, Program Manager ng Kilusan Ligtas Malaria sa ilalim ng Provincial Health Office ( PHO), sa mga ahensiyang patuloy na nagbibigay ng malaking suporta lalo’t higit sa aspeto ng pagpopondo upang mas mapaigting ang implementasyon ng programa. “Very thankful kami kasi all out ang support ng Global Fund pagdating sa malaria program, in all the commodities and logistics pagdating sa operation for malaria ay sila ang nagpo-provide” ani Gng. Balderian. Dagdag pa nito , malaki na ang ibinaba ng kaso noong taong 2017 na kung saan nakapagtala lamang ito ng humigit-kumulang 3,000 kaso kumpara noong taong 2016 na tinatayang umabot sa 6,000 ang nagkasakit ng malaria sa lalawigan.