KAMPANYA LABAN SA ILIGAL NA DROGA, MAGKATUWANG NA ITINAGUYOD NG PADAC AT PDEA-MIMAROPA SA CALAMIANES

Naging matagumpay ang isinagawang Barangay Drug-Clearing Enhancement Program sa Coron Palawan noong ika-10 ng Oktubre, taong kasalukuyan. Pinangunahan ito ng Provincial Anti-Drug Abuse Program (PADAP) ng Pamahalaang Panlalawigan ng Palawan katuwang ang Philippine Drug Enforcement Agency (PDEA) MIMAROPA.

Ayon kay Dir. Mario Ramos, Regional Director ng PDEA MIMAROPA, kakulangan ng tao sa kanilang tanggapan ang isa sa mga kahinaan nila dahilan kaya nagrequest ito sa PNP na magkaroon ng weekly Anti-Drug Management Operation.

Si Dir. Ramos ay nagsilbing panauhing pandangal at Key Resource Person ng aktibidad na ito na dinaluhan ng isangdaan at dalawampung mga partisipante kabilang ang mga alkalde mula bayan ng Coron, Busuanga, Culion at Linapacan.

Nakiisa rin ang mga Sangguniang Bayan Members, Department of Interior and Local Government, Municipal Health Office Barangay Captains at Kagawad.

Ilan sa mga tinalakay ay patungkol sa Drug Classification, National Drug Situation, at Categories of Drug Affected Barangays.

Samantala, isinagawa rin sa Coron School of Fisheries ang Information Dissemination Campaign against Illegal Drugs noong ika-9 ng Oktubre at ito ay dinaluhan ng isang daan na partisipante mula sa Grade 11 and 12 at sinundan naman ng kahalintulad na aktibidad sa harap ng isang daang estudyante ng Salvacion National High School sa bayan ng Busuanga noong ika-11 ng Oktubre. Itinuro sa mga estudyante ang Classification and Types of Drugs and Harmful Effects ganoon din ang Data Presentation ng Anti-illegal Drug campaign.