MGA KAWANI NG PALAWAN RESCUE 165, SUMAILALIM SA TOURISM AWARENESS SEMINAR

Sumailalim sa Tourism Awareness Seminar with Costumer Service ang mga empleyado ng Palawan Rescue 165 sa mga munisipyo ng Aborlan at Narra.

Ang seminar ay isinagawa sa mga operation centers ng naturang munisipyo sa pangunguna ng Provincial Tourism Promotions and Development Department (PTPDD).

Unang ginanap ang seminar sa Aborlan Operation Center noong ika-15 hanggang ika-16 ng Oktubre habang isinagawa naman ito sa munisipyo ng Narra nang sumunod na araw.

Layunin ng gawain na bigyang kamalayan ang mga partisipante patungkol sa turismo at maipakilala ang kahalagahan at kontribusyon ng naturang industriya sa mga lokal na komunidad.

Kasama rin sa pakay ng seminar na maipaunawa sa mga kawani ng Palawan Rescue 165 ang kahalagahan ng kaligtasan ng mga turista at masanay ang mga ito sa mga serbisyong ibinibigay at ang pagbuo ng mga polisiya at gawi para sa pagsisiguro ng kaligtasan at seguridad ng mga turista sa kanilang komunidad.

Samantala, magsasagawa rin ng kahalintulad na seminar sa iba pang operation centers ng Palawan Rescue 165 sa buong lalawigan.