KASUNDUAN SA IMPLEMENTASYON NG LOCALIZED RENEWABLE ENERGY PLANNING PROJECT SA PALAWAN, NILAGDAAN

Nilagdaan nito lamang ika28 ng Nobyembre, 2018 ang kasunduan sa pagitan ng Department of Energy at Pamahalaang Panlalawigan ng Palawan para sa implementasyon ng “Localized Renewable Energy Planning Project” sa lalawigan na inaasahang malaki ang maitutulong upang maibsan ang perwisyong dulot ng hindi maayos na suplay ng kuryente. Ang naturang kasunduan ay ipapatupad sa ilalim ng Development for Renewable Energy Applications Mainstreaming and Market Sustainability Project ng DOE kung saan katuwang nito ang United Nations Development Programme at Global Environment Facility. Layon ng DREAMS Project na mabawasan ang greenhouse gas emissions mula sa industriya ng kuryente sa pamamagitan ng promosyon ng commercial- ization ng renewable energy na nakikitang malaking tulong upang mas dumami pa ang mga pumapasok na kapitalista sa lalawigan. Nilalaman din ng kasunduan ang layuning madagdagan ang kapasidad ng mga lokal na pamahalaan sa pagpaplano ng paggamit at distribusyon ng enerhiya. Nakasaad sa naturang kasunduan ang pagsagawa ng konsultasyon sa lalawigan at mga pagpupulong upang mapakinggan ng mga kinatawan mula sa DOE at UNDP ang mga kinahaharap na usapin ng mga lokal na pamahalaan at mga pribadong establisyimiyento sa lalawigan kaugnay ng enerhiya. Ayon kay Titon Mitra, Country Director ng UNDP, 59% ng mga kabahayan sa lalawigan ang hindi pa konektado sa grid at dahil bumababa na ang halaga ng Renewable Energy sa mer- kado ay kanyang iminungkahi na gumamit ng RE. Sa kabilang banda naman ay iminungkahi ni USEC. Felix William Fuentebella ng DOE na dapat ay isipin muna kung ano ang mga maaaring pagkunan ng enerhiya sa lalawigan. Aniya, ang Palawan ay mayroong solar, hydro, ocean, at wind energy sources. Kailangan umano na tignan kung papaano magagamit ang mga ito sa ligtas at maayos na paraan. Samantala, ayon naman kay Gov. Jose Alvarez, hindi na nakakatuwa ang sitwasyon ng kuryente sa lalawigan. Aniya, dapat umano na mayroon nang suplay ng kuryente bago pa man magkaroon ng demand sa lalawigan. Hiling nya na sana ay maging bahagi ng misyon ng lalawigan ang kasunduang kanilang nilagdaan upang makamit ang kaunlarang pinapangarap sa Palawan.