MGA KOOPERATIBA, PINAAALAHANAN SA PAGSUSUMITE NG MANDATORY REPORTS SA CDA.
Pinaalalahanan ng Cooperative Development Authority-Palawan ang mga kooperatiba sa lalawigan na magsumite ng kanilang mandatory reports bago matapos ang buwan ng Abril ng taong kasalukuyan.
Ito ay inihayag kaugnay ng isinagawang orientation workshop ng CDA-Palawan sa pakikipagtulungan sa Provincial Cooperative Development Office noong ika-26 ng Pebrero sa Victoriano J. Rodriguez Hall ng gusaling Kapitolyo.
Ang pagsusumite ng mandatory reports sa CDA ay kinakailangan upang makatanggap ang mga kooperatiba ng Certificate of Compliance o COC base sa itinakda ng CDA Memorandum Circular 2016-07.
Ayon kay Provincial Cooperative Development Specialist Marian Con- cepcion, ang COC ang magpapatunay na ang kooperatiba ay isang ‘compliant cooperative’. Ito rin ay mahalaga upang makakuha ng Certificate of Tax Exemption at maka-avail ng iba pang insentibo at prebilihiyo ang mga kooperatiba.
Ilan sa mga kinakailangang isumite para sa micro, small at medium cooperatives ay ang Cooperative Annual Progress Report kung saan kalakip nito ang iba pang mahahalagang dokumento tulad ng audited financial statement, list of officers and mandatory trainings undertaken/completed, social audit report, governance and management audit report, semi-annual report on mediation and conciliation at ang certification fee na P100.