Code switching sa pagtuturo ng Filipino epektibo nga ba?
MALAKI ang papel na ginagampanan ng wika sa larangan ng edukasyon. Sa pamamagitan nito, nauunawaan ng mga mambabasa ang kanilang naririnig o nababasa ayon sa kanilang kakayahan, kung paano nila ipalilwanag ang kanilang natutunan o natuklasan batay sa naririnig, nasaksihan o nabasa.
Sa pagdaan ng panahon ,patuloy ang naging pagkilos tungo sa tinatawag na globalisasyon. Kasabay ng pag-unlad ay ang pagkakaroon ng iba’t ibang barayti ng wika. Isang linggwistikong realidad ang pagkakaroon ng maraming wika. Napakalaking salik ang gampanin nito sa pagtuturo at pag- unawa ng mga mag- aaral. Kahit na sabihing mayroong pambansang wika,nananatili pa rin ang barayti at baryasyon nito na dinamikong mahuhgubog at humuhubog sa mga kasalong wika. Sa madaling salita,realidad ang tinatawag na multilinggwalismo sa ating bansa.
Sa loob ng halos labin limang taon kong pagtuturo sa paaralan, napansin ko ang kahirapan ng mga mag- aaral sa paggamit ng wikang Filipino lalong lalo na kapag ang paksang tinatalakay ay pampanitikan. Karamihan sa kanila ay nahihirapang unawain ang mga nais ipahiwaitg ng akdang binabasa na kadalasang hindi nila natatapos ang pagbabasa na naging dahilan ng kanilang mababang antas ng pagkatuto,at hindi makaunawa sa nais ipaabot ng mayakda, na nagbubunsod sa kanila ng kawalang interes sa pakikipagtalakayan ng nasabing paksa.
Nahihirapan silang maipaliwanag ang nais ipaabot ng akdang tinalakay sa kadahilanang salat sila sa pag-unawa ng tinatalakay na akda, na kung saan wala silang natutunan o maisagot sa paksang tinatalakay. Isa pa sa dahilan ay ang kahirapan ng mga mag- aaral sa paggamit ng wikang Filipino sa pagpapahayag ng kanilang saloobin sa paksang tinatalakay.Dahil dito,hindi nila maipaliwanag ang nais ipaabot, at sa halip, tumatahimik na lamang sila kahit na mayroon silang ideya sa nasabing paksa, at kapag sila ay pilitin ng kanilang guro na ipaliwanag ang kanilang sariling pag-unawa batay sa paksang tinatalakay, dito na pumapasok ang pagpapaliwanag ng mga mag-aaral ng kanilang naunawaan sa pamamagitan ng pagpapahayag ng ayon sa salitang kanilang nakasanayan, at kadalasan ang kanilang ginagamit ay ang wikang Hiligaynon.
Ito ang nagbunsod sa akin bilang guro na gumamit ng code switching upang lalong maunawaan ng mga mag-aaral ang nais ipaabot o iturong nilalaman. Sa pamamagitan nito, lubos at mas mainam ang pagkatutong ipinamalas sa mga mag-aaral, ganoon din sa bahagi ng mga mag-aaral kung saan sa kanilang pagpapahayag ng opinion o kaalaman,
hindi maiiwasan na gumamit din sila ng code switching upang lalo nilang maipahayag ang kanilang saloobin at nilalaman ng kanilang kaalaman upang lalong mapagtibay ang pag-unawang pampanitikan ng mga mag-aaral.
Ang paggamit ng code switching sa kasalukuyang panahon ay hindi na mapapasubalian. Sa mundo ng edukasyon, ang “code switching” ay napag- alamang kapaki- pakinabang sa pang impormasyon at pansariling layunin ng komunikasyon. May mga pag-aaral na nagpapakita na ang code switching ay kailangan sa pag intindi ng mga kakulangan ng pag-unawa ng mga mag-aaral na nag-uugat sa pagiging salat sa kahusayan o kaalaman ng mga ito sa araling pangwika.
Ayon kay Carmelita Abdurahman, isa sa labing isa sa komisyoner ng Komisyon ng wikang Filipino, walang masama sa code switching upang magkaroon ng mas epektibong komonikasyon. Hindi maiiwasan ang pag-code switch dahil kulang sa katumbas sa wikang Filipino ang iulang mga salita o termino. Ginagamit ang code switching sa silid-aralan sa mga asignaturang tulad ng agham at matematika kung saan may mga teknikal na mga termino na kadalasan ay walang katumbas ang isang salita sa Filipino, at mas madaling magkaunawaan kung nagpapahayag ng ilang mga salitang mas madaling intindihin.
Ang kakayahang mag-code switch ay mahalagang kasangkapan para sa isang indibidwal sa proseso ng pagkatuto sa loob ng isang lipunang napapaligiran ng maraming wika at kultura. Ang paggamit ng code switching ay ytinatanaw bilang giya sa akademikong layunin at intensiyon ng mga mag-aaral, gayundin sa paggabay sa pagbibigay-kahulugan sa pakikipag-ugnayan sa loob ng silidaralan. ( Paid article)