Panitikan sa panahon ng mga milenyal
GUSTO kong bigyang diin muli ang mga huli kong nasabi sa isa kong artikulo tungkol sa pagkakasaad ko sa panitikan sa panahon ng Kastila at ng Amerikano. Ito ay sa kadahilanang gaya ng aking inihalimbawa, sa taonang Translascion ng Itim na Nazareno sa Quiapo, Manila na ginanap kahapon, hindi lingid sa mga naibalita sa telebisyon na halos marami rami na ring deboto na mga kabataan o ang tinatawag nating milenyal sa ngayon.
Naitanong nga ng mga mamahayag kung seryoso nga ba sila sa kanilang debosyon o sa panata at mga ginagawa tuwing Translacion gaya ng paawit na misa, mga panalangin na siyang bahagi ng panitikan mula pa ng sinaunang panahon. Kung kayat, binibigyan diin ko na kung hindi natin babalikan ang mga panitikan na ating natutunan mula pa sa ating kanununuan, hindi natin maiintindihan ang mga uri nitong atin pa ring isinasagawa hanggang ngayon. Hindi maiintindihan ng mga kabataan sa ngayon kung bakit nila ginagawa yun. Kung aalisin natin
ang asignaturang Filipino, paano natin mapapanatili ang ating wika. Kung ganitong malalim na nga ang ating pagkakaintindi at mas madalas pa nating magamit ang banyagang salita kaysa sa sariling atin, nawawala na ang wikang Filipino, paano pa kaya kung kanselahin natin ang pagtuturo ng asignaturang ito?
Ang panitikan sa kasalukuyang panahon kung tumatatak man sa mga utak nating mga Pilipino lalo na sa mga kabataan, kumukunti na lang sapagkat sa pag-usbong ng teknolohiya na siyang ginagamit na ring akdang pampanitikan, ang mga milenyal ay mas nahuhumaling na sa chat, twit, FB, blog at maging jejemon at marami pang iba. Madalas galing ng Amerika o ibang bansa ang mga panitikang gamit ngayon kaya bumababa ang tingin ng mga tao sa mga likhain na dating gamay ng bansang ito.
Nalimutan na ang halaga at galing n gating mga manunulat, direktor at mga artistang nagbibigay
karangalan sa ating wika at panitikan. Kung meron man sa kasalakuyan na prominenteng masasabing atin, yun ay ang mga t ula o spoken poetry. Mababatid na sumasabay ang panitikan sa modernisasyon ng mundo kung saan nagbabago ang aspeto ng teknolohiya o maging ng internet.
Dahil dito nailuluwal ang makabagong anyo sa pamamaraan ng pagtula at pagkwento. Merong mga kwento na isinusulat at ibinibidyo at i na- upload sa Youtube gaya ng ginawa ni Marcelo Santos III na ngayo’y may dalawang libro ng nailimbag dahil sa milyung mga nag-subscribe sa kanyang Youtube channel. Nariyan din ang mga lupon ng maiikling tula na mabilis basahin at ang battle rap na pinabantog ng Flip Top Battle League na makabagong anyo ng balagtasan.
Dahil din sa internet mas naging malapit o naging accessible ang mga akda, tula at sulatin ng mga manunulat sa maraming mambabasa, o mga mambabasa na hawak ang cellphone, o mga mambabasa na kadalasan hindi na kailangang pumunta sa teatro o simbahan o maging magbayad para makapanuod ng uri ng panitikan gaya noong araw. May mga kwento ding Wattpad na nailimbag bilang aklat at maging napanuod na sa pelikula.
Naging modernisado man ang uri ng pagpapahayag o paggamit ng mga milenyal ngayon sa ating panitikan, ang importante sa akin bilang guro ay ang hindi ito mawala sa ating kasaysayan at napapanatili nito ang ating wika at pagkakakilanlan.
Kung nakikiayon ito sa pag- unlad ng ating teknolohiya, at kung ito ay magbibigay daan para ang ating kabataan ay patuloy na magkaroon ng plataporma kung saan maipapahayag at maipamamalas nila ang kanilang mga nararamdaman at ang kanilang talento gamit ang ating sariling wika, ako bilang guro ay buo ang suporta anuman ang maging anyo ng ating panitikan. ( Paid article)