Ang purungkuan nga tumba-tumba

Ni: Gina D. PReSenTe,

Master Teacher- II Sabang II Elementary School

Caluya, Antique “Linda, Linda, diin run ikaw?” panawag ni Nanay. “Hay maan lang dyan nanay. Rugto si Linda nagtawas kay tatay sa taramnan,” hambal ni Manong Ben. “Sus nga bata ria, tatlo run ka adlaw ang ginahambalan nga tarapuhan ang purungkuan nga tumba-tumba. Daw sa wara lang kana,” sabat ni Nanay. “Man-an mo Nanay. Ginhambal kanakun kahapon ni Linda nga nahadluk tana magparapit sa purungkuan ng tumba-tumba,” hambal ni Manong Ben. “Kag wanhaw kuno?” pamangkot ni Nanay. “Tungud sangka gabii kuno nakita na ang purungkuan nga tumba-tumba nga nagahulag,” panugidun ni Manong Ben. “Hahaha… Ay abaw lang gid.” Kang masunod nga gabii… “Linda, palihog buul kang tsinelas ko sa sala. Darha rugya sa kuwarto ko,” sugo ni Nanay. “Nanay, man tana tamad ako. Kaharadluk rugto sa sala,” sabat ko kay nanay. “Ah, man-an ko run ria. Panaw bul-a rugto wara ikaw ti dapat kahadlukan rugto,” pamirit ni Nanay. “Ay a,” pang-indi ko. “Panaw run!” pamirit ni Nanay. Wara ako ti may mahimo kundi sinunod si Nanay. “Dios ko baw, buligi man ako basi maghulag ruman ang purungkuan nga tumba-tumba. Hala, hambal ko gid haw nagahulag ruman ang purungkuan nga tumba-tumba.” Nagakurudug ako nga ginparapitan ang tsinelas sa ingud kang purungkuan nga tumba-tumba. Kag… “Ay sus lamang run, sika halin dyan,” tabog ko sa kuti nga nagapungko-pungko sa likod nga kahig kang purungkuan ng tumba-tumba. “Dumdum ko man nga nagahulag dya gali timo kada hulag kang kuti nagahulag man ang purungkuan nga tumba-tumba.

*Mga estorya para sa Grade 1 sa Kinaray-a Pahanumdum: Ang dya nga mga estorya puwede magamit sa Key Stage 1 sa bisan ano nga subject area. Pangitaan lang kang nagakaigo ng kompetensiya.(Contributed article)