Isyu, sutil ken karit – intay ikayetket!
ITAY nabiit…kasla bimtak a kimat ken gurruod ti isyu panggep iti rimmuar a mandamiyento de aresto kenni Sen. Antonio Trillanes 1V. Kasla met bimtak a bulkan dagiti nagsisimparat a reaksiyon dagiti umili. Adda nagpalakpak, adda nasdaaw, adda nagtabbaaw, adda nangumsi, adda nagdanag ngem kangrunaan iti amin, adu dagiti immangkas wenno nakilugan wenno nakisampitaw wenno immepal tapno makiranudda laeng iti nagburek nga isyu para iti bukodda met a motibo iti biag nangruna iti pampulitika. Adtoy ti basnot ti Isyu, Sutil ken Karit:
***
ISYU: Rebelyon ti kaso ni Trillanes ngem apay kano a nakapag-piyansa? Nadagsen a kaso ti rebelyon, saan aya pards? Ngem kuna dagiti legal a luminaryo: uray nadagsen ti maysa a kaso no adda masirsirip kano ti pangukoman a sangapirgis a panagalangan kadagiti naiparang nga ebidensiya, mabalinda kano a mapaboran ti piyansa. Ti kayatna a sawen kadi ket nalagan wenno kurang ti pammabasol? SUTIL: kayatna kadi a sawen a no adda man dagiti kakadua ni Trillanes a immawat iti amnestiya idi panawen ni Ex-Pres. Pinoy…mabalinda met ti agpiyansa? Kaawatan kadi nga agtuloy manen ti kasoda a rebelyon uray pay no ania itan ti trabahoda iti agdama? Saan aya nga adda pay ditan ti nagbalin a representante, miyembro ti gabinete ken dadduma pay a nangato a posisyon. KARIT: no kas pangarigan ta agbanag a GUILTY ti resulta ti kasoda a rebelyon….anianto ti sumaganad a mapasamak? Deretso karseldanton, saan aya? Surotentayo ti isyu.
***
ISYU: iti pannakaisursurat daytoy nga espasyo…matagtagiuray pay laeng ti pinal a pangeddeng ti RTC-148 panggep iti kaso a Kudeta ni Trillanes. No mangipaulogen ti nasao a Korte iti warrant of arrest, natural a maaresto manen ti senador. Ngem saanen a makapagpiyansa. Kayatna a sawen…kulong daytoy. Naammuan ti Karit a babaen iti follow up ti media, kinuna ni Trillanes a nakasagana daytoy a maaresto ken agpakulong. Ti sumaganad ket ti pannagnanton ti imbestigasyon iti dayta a kaso a kas met iti imbestigasyon iti kasona a rebelyon. SUTIL: kas nakunan ni Trillanes kadagiti interviews a nagna iti proseso sakbay a naited kenkuana ti amnestiya. Kasta met ti daplis ni Rep. Alijano, kadua ti senador manipud Magdalo. Adda alegasyonda a nailemmeng kano dagiti dokumentos a pinirmaanda idi sakbay ti amnestiya. KARIT: saan pay nga insubmitar ti kampo ni Trillanes ti mosyon wenno addangda sadiay Korte Suprema a mangkuweskuwestiyon iti pannakaarestarna gapu iti kaso a rebelyon. Urayenda pay kano ti desisyon ti RTC 148 panggep iti kaso a Kudeta. Ket kalpasanna, idatagdanton iti Korte Suprema ti mosyon ken apelada. No anianto met ti makuna a pinal ti Korte Suprema…daytanto ti intay ammuen. Ngamin no magnanton ti imbestigasyon, natural, rummuarto amin ditan dagiti agsusumbangir a benneg panggep kadagiti nakuna a kaskaso. Ditay sinaan dagita a kontrobersiya, pards.
***
ISYU: kas pangarigan ta maaresto manen ni Trillanes gapu iti kaso a Kudeta, agsarakdanto iti nakakulong met a Senador Leila De Lima idiay PNP Custodial Center sadiay Camp Crame. Tsk tsk…napait a panagsarak, saan kadi? Naisagana kanon kuna ti PNP ti selda ni Trillanes kas pangarigan. Madanon met dita ti senador ni Senador Ramon “Bong” Revilla Jr. a nakakulong met gapu iti kaso a graft and corruption iti multibillion a PDAF a ti maitudtudo a reyna iti pork barrel scam ket ni Janet Lim. SUTIL: kas pangarigan ta saan pay a mangiparuar ti RTC 148 iti warrant of arrest, kaawatan kadi nga