Hamon ng pananaliksik sa senior high school
ISA sa mahalagang asignatura ngayon ang Pananaliksik. Isa na itong pangunahing pangangailangan sa bawat mag-aaral lalo na sa Senior High School. Kung susuriin ang nilalaman ng curriculum ng Senior High School, marami sa kanilang asignatura ay nangangailangan ng pananaliksik. Isa sa mga nalilinang ng pananaliksik ang kakayahang komunikatibo at ang makrong kasanayang pagbasa at pagsulat.
Ayon sa dating kalihim ng Kagawaran ng Edukasyon na si Armin Luistro (2012), angK to 12 ay magdudulot ng magandang bunga sa kabataan. Sa pagdaragdag ng dalawang taon sa hayskul, inaasahang ganap na mahahasa ang mga magaaral. Ilan sa mga pagbabagong magaganap ay ang pagpapalawak ng kurikulum higit lalo ang pagdaragdag ng asignaturang pananaliksik sa Senior High School upang maging lubos ang paglinang ng mga kasanayan sa batayang edukasyon gaya ng lubos na kakayahan sa komunikasyon at iba pa.
Binanggit ni Undersecretary Dina S. Ocampo na isa sa mga katangian ng K to 12 Curriculum na nakabatay sa Sec. 5 (e) RA 1053 ay ang paggamit ng mga dulog sa pagtuturo tulad ng constructivism, inquirybased, collaborative, at integrative. Binibigyang – diin sa kasalukuyang kurikulum ang paghahasa ng kakayahan sa pananaliksik ng mga mag-aaral kaya naman maraming asignatura sa Senior High School ang kinasasangkutan ng pananaliksik.
Ang mga asignatura na may paksang pananaliksik ay ang mga Core subject na Komunikasyon at Pananaliksik sa Wika at Kulturang Filipino, Pagbasa at Pagsusuri ng Iba’t Ibang Teksto tungo sa Pananaliksik, Applied subject na English for Academic and Professional Purposes, Filipino sa Piling Larang, Practical Research 1 (Qualitative Research), Practical Research 2 (Quantitative Research, Empowerment Technologies, Inquiries and Investigation, at Research and Immersion.
Sabi nga nina Lartec, Espique, Tanawan, Ramos & Dotimas (2011), tunay ngang mahalaga ang sa lahat ng larangan tungo sa pag-unlad. Ang pananaliksik ang nagiging daan sa pagtuklas ng iba’t ibang kaalaman. Sa kalagayan ng bansa at edukasyon ngayon, hindi sapat ang mga teorya at kaalamang natatamo ng mga mag-aaral, bagkus dapat silang kumikilos at gumawa sa ganang sarili upang matugunan ang hamon ng edukasyon.