Karit ken basnot pampulitika!
NALPASEN ti panagipila iti kandidatura (COC Filing). Matagtagiuray laengen ti eleksiyon inton umay a Mayo 13, 2019. Ngem iti nagbaetan ti panawen manipud ita agingga iti dayta a naitani a petsa…adu pay dagiti agtutuon nga eksena a rumbeng a magamulo ken mataming tapno maukas tay innatapan, binnarsakan iti pitak, dinnadaelan iti nagan ken moraledad ken panagnakanak iti dara.
No koma ta mabalin…awan dagitan a ramen ken rugit ti pulitika. Ngem kaano pay a nadalusan dayta a desdes ti sosyodad? Kaano pay a nakuna a nadalus ken natalna dagiti naglabas nga eleksiyon ket nabudian met iti kinnusit ken krimen.
Sa ita…arapaap ni Juan dela Cruz a natalna koma ken nadalus ti masungad a panagpipili. Kasla sangsangkamaysa ti dir-i dagiti kailiantayo: Mamatika!
Ala…tulongandakami nga agsukimat bareng makaep-ep iti sanaang ken areng-eng ni Pulitika:
*** Pirak…kuarta…puonan ti kasapulan no tumapogka iti pulitika. Pirak para kadagitay kabaelanda ti gumastos babaen iti bukodda a nagling-etan.
Kuarta, kunada no tulong dagiti addaan tapno mapatarayda laeng dagiti manokda. Ngem puonan gayam dagita iti masakbayan para kadagiti tao nga addaan nangisit a panggep. Dagitanto dagiti agsirbi a sairo iti likud dagiti agballigi a kandidato.
Isudanto ti agbalin a diktador iti likud dagiti pulitiko a natulonganda. Piman met ni timmugaw nga opisyal ta isunton ti maipit ken maisaang iti apuy iti sango dagiti umili.
Tsk tsk…dayta ti gapuna no apay nga adda dagiti maipatugaw nga agbalin a kurakot, tuleng, bulag ken kontra panagdur-as ta nagbalinen a demonyo, uleg, banyas, buwaya ta nakaramanen. Ti kaasi ket datayo nga umili a nagtaltalek idi kadakuada. Namin-anon a naul-ulit dagita nga eksena. Pudno a makauman ngem gapu iti nasasam-it a pannarita a giddanan pay iti papetpet a pirak….ikidemanen ti kaadduan dagiti sumaganad a mapasamak. Saludsod: dayta kadi ti kayattayo a pondasyon ti masakbayan?
Ita pay laeng a kalkalpas ti COC filing, maal-alimamadmin ti asug ti masakbayan. Maatipa laeng dayta a pagteng no datayo a botante ti agtignay ken maaddaan iti umno a panagarisit ken pangeddeng para iti nasin-aw a masakbayan ti puli…tay natibker a takder a dinto gaburan ti makapurar a pirak ken kari dagiti kandidato.
Kas kannawidan: naamoda a kumaraba sakbay iti eleksiyon, ngem arigdanton iti nabisinan a leon apaman a nakapueston. Sabagay…saan nga amin nga agngayangay ket mananggundaway ken nalaka nga aglulok iti arasaas ni sairo. Ad-adu kano nga amang dagiti addaan puso ken napudno nga agsirbi. Dagita dagiti rumbeng a suportaran ken kabigen dagiti umili.
Aladantayo ida tapno dindanto maspak iti kinaadu dagiti sulisog ti biag. Ti nasakit ngamin: ammom langaruden a suitek ken di mapagtalkan, imbutosmo pay laeng gapu iti impabulsana kenka a reppet ti papel de bangko. Piman a masakbayan. Naudin ti amin no mariknam ti babawi. Naikursongkan, kabsat.
***
Adtoy kano dagiti pagarisitan kadagiti rumbeng a maitandudo a kandidato: nagaget, mannakitao, maka-Diyos, manangisakit, napakumbaba, narestpeto, nadalus a kinatao, natenneb ken natibker a lider, managtulong, nalaka a maasitgan, ken pudno a tao.
Dagiti met kano rumbeng nga annadan a pakabuklan dagiti papili: awan-Diyosna; isuna laeng ti nalaing; sadot; awan talekna iti