SEAG… napusek iti kontrobersiya!
DIPAY nangrugi ti SEAG wenno ti South east Asian Games (pormal a nailukat idi Nov. 30 idiay Bulacan)… nagluludonen dagiti agkakabangsit a basnot. Immuna a nagbibinnakalda gapu iti dayta “kaldero” nga imbutaktak ni Sen. Drilon nga overpriced kano. Dayta ti “cauldron” a kas simbolo ti pa-ay-ayam ken panagkaykaysa dagiti atleta ditoy rehiyon ti Asya.
Simmarunon dagiti nagririgudon a reklamo dagiti delagados (kano) gapu iti isyu ti makan ken pagnaedanda. Dita a simmikat ti pulutan a “kikiam.” Awan ressatnan dayta a saritaan. Ngem nakadidillaw a kasla adda mapaspasamak a pinnadakes tapno madadael laeng ti imahe ti Pilipinas a kas host country. Nakadidillaw, kuna dagiti observers a kasla adda dagiti grupo a mangar-aramat kadagiti babassit ken isolated incidents iti SEAG tapno pagbalinenda a higante a kontrobersiya tapno marpuog ti kridibilidad ti administrasyon ken ti organizer ti ASEAG. Ngem sakbay nga intay binsa-binsaen nga ilawlawag dagita a panirigan… intay man biit lagipen dagiti kontrobersiya kadagiti naglabas nga aldaw:
*** Pagaammon ti amin nga inikkaten ni Pres. Duterte ni VP Leni ‘Robredo a kas ICAD co-chairman itay laeng nabiit. Daytoy ket kalpasan iti arig 19 laeng nga aldawna iti takem. Ti kano makagapu: pannakaikkat iti talek.
Saludsod: Idi naited ti akem kenni VP Leni…adda kadi kabuyogna a talek? Natural nga adda ta ngamin, kunada… saan nga idiaya ti administrasyon ni Digong ti nakuna a posisyon no awan talekna. Ti laeng panawen ti medyo sintonado ngamin ta naidiaya ti posisyon kalpasan dagiti adu a basnot ni VP Leni kontra iti kampanya ni Digong kontra illegal a Droga.
In short, ti posisyon ket kas maysa a karit tapno ipakita ni bise presidente a kayana ti akmen nga ibakbaklay ni Pres. Duterte. Ti imasna, adda dagiti reports a negatibo panggep iti inar-aramid nga addang ni VP Leni a saan a mayannatop iti plano ken programa kontra droga nga ipatpatungpal ita ti administrasyon. Inawat met ni Leni ti pangeddeng ngem nangyaplag iti ballaag nga inna kano ibutaktak amin nga ammona panggep iti kampanya kontra droga. Kinagat met ti PDEA (c/o Aquino) ti ballaag ket urayenda dagiti ibutaktak ti bise presidente. Iti daytoy a sistema, adda masirsiriptayo nga agpaut pay ti tensiyon iti baet da Digong ken Leni.
Tsk tsk…sayang, kuna ti kaadduan….ti ammoda ket agkaykaysan dagiti dua idi nagkiddaw iti sorry ni Digong kenni Leni gapu iti “fake news” ngem baliktad ti napasamak. Adu pay dagiti eksenada ti matagtagiuray.
***
Mapan iti mapattapatta a P2.7 bilyon ti masuspetsa a shabu a nakumpiskar ti PNP Drug Enforcement Group iti impakatda a buy bust operations iti maysa nga entrapment sadiay Makati City itay nabiit. Adda itan iti kustodiya ti DEG sadiay Kampo Krame sadiay Quezon City ti suspect a ni Liu Chao, Chinese National a taga San Antonio barangay, Makati City. Naappot dagiti illegal a droga iti mismo a kuwarto ti suspect a mapan iti 400 kilos a nakasilid kadagiti tea bags, dog food packaging, maleta ken cabinet. Adda atap dagiti otoridad a dagiti droga ket naipuslit manipud ballasiw-taaw ket nagsirbi laeng a bodega ti nakuna a balay ti suspect.
Tuntuntunoen pay laeng dagiti otoridad no kasano a nakalusot wenno nakastrek dagiti illegal a droga ditoy pagilian. Kas kuna ti PNPDEG, daytoyen ti kadakkelan a gatad ti droga a naiserrek ken naapot ditoy pagilian ita a panawen. Insakuntipda: Sayang… awanen iti ICAD ni VP Leni sakbay a napasamak ti buy bust. No isu pay laeng koma ti ICAD-Chair, mabalinna
nga ipannakkel a daytoy ket gappuananna, saan aya?
No koma sibibiag pay laeng daydi lolok, adtoy ti makunana: “Sayang…sayang ni VP Leni. Nagaget pay met ngarud ken natured. No nakatalikud… mariakusina, kasla makitkitak daydi baketko. Puwera ti gurongna ta simmabunganay kenni VP Leni idinto ta ni baket ket akasia. Sapay koma ta agsinnubliananto met laeng ti tinnalekda a dua.”
Tsk tsk… kasla dinton mapasamak dayta lolong ta umadanin ti eleksiyon. Masitaksitakdanto manen gapu laeng iti ambisyonda iti pulitika.
***
Busan South Korea Trip ni Pres. Duterte…nabunga. Daytoy ti pinaneknekan dagiti reports nga adda gayam uppat a kangrunaan a tratado wenno napagnummuanda iti no mano aldaw a taripnong. Nagsentro dagiti nayalat ti Pilipinas a tratado ket mainaig iti seguridad, turismo, ekonomya ken patrabaho. No panggep iti seguridad, manamnaman a katulongan ti Pilipinas ti South Korea, aniaman a pagteng iti seguridad, talna ken kapia iti baet dagiti pagpagilian iti Asya. Addada a sidadaan a bumadang kadagiti parikuttayo kas pangarigan. Daytoy ket gapu iti dumegdegdeg a sinsinniput dagiti puwersa ti pagilian ken Tsina gapu kadagiti territorial claims.
Sabagay, kinapudnona, adda payen Korean Town nga impasdek ti Korean Government idiay NCR kas pammaneknek iti talentalek ti dua a pagilian. Arasaas: mabalin ngata met a maaddaantayto met iti Philippine Town idiay South Korea? Amangan ta mapasamakto, pards.
Saludsod: adun dagiti nai-deport ken naaresto a Chinese itay kallabes gapu iti panagtrabahoda ditoy pagilian nga illegal. Kadagiti ngata met Koreano… adda met ngata?
***
Intayon buweltaan ti isyu panggep iti SEAG. Saludsod: awan ngata ti grupo a kontra Duterte wenno kontra Speaker Cayetano (Chairman ti Phisgoc) ti akinnakem ken akin-operandi tapno rummuar dagiti agkakanat a nagkurangan kano ti SEAG organizer para kadagiti atleta, delagado ken dadduma pay a parikut?
Kas koma iti kasimplean laengen a parikut: Rimmuar iti alegasyon a “kikiam” kano ti naidasar nga armusar dagiti atleta a Pilipino. Ngem kuna ti mismo a caterer (Mr. Lim) ket saan kano met a kikiam no di ketdi chicken nuggets. Ngem pinadakkelda ti nakuna nga isyu. Adda payen dagiti nagkumento a rumbeng kano a naimas ken nasustansiya ti maipakan kadagiti atleta tapno adda pamigsada. Ngem sungbat met ni Senate President Sotto nga idi atleta pay daytoy a limmaban iti SEAG idi 1970, saan a nasayaat ti pannakatratoda.
Isu a nakunana a saan nga obligasyon ti host country a pakanen dagiti gangannaet nga atleta ken delegado ta kasta idi ti inaramidda iti inatindaranda a SEA games. Kasta met laeng ti pammaneknek ni Alejandro Baldo Jr., sigud a Philippine Azkals U22 team member. Nagidoronda pay kano iti double decker bus ta nadadaelanda iti tengnga ti kalsada sadiay Bangkok, Thailand. Kuna met ni Badminton player a ni Anton Cayanan, a napadasanda ti nagpasar iti “inadequate food supply” iti hotelda idi 2017 SEA Games idiay Malaysia.
Tsk tsk… adu pay dagiti imbutaktak dagiti nakapadasen nga atleta iti makaupay a trato idiay ballasiw-taaw ngem nagulimekda laengen. Sapay koma ta no aniaman ti tungpal dagiti karit ken ballaag ni Pres. Duterte kadagiti maduptalan a nagkurang iti serbisyo iti pakabuklan ti SEAG….maibutaktakto a sigida kalpasan ti pay-ayam. Manipud “kaldero” agingga iti “kikiam” matagi-uray ti tungpalda iti masakbayan.
Good luck kadagiti atleta. Lalaingenyo. Dikay koma paatiw kadagiti kontrobersiya. God bless.
Adios mi amor, ciao, mabalos!