21 KANDIDATA SA MISS KUYAMIS 2020, GIPAILA NA

PORMAL nang gipaila ni Gobernador Bambi Emano ang 21 ka kandidata sa umalabot nga Search for Miss Kuyamis 2020, isa sa kalihukan alayon sa kasaulogan sa Kuyamis Festival 2020 sa Enero 2020.

Atol gayud sa sinemanang pagpakayab sa nasudnong bandila sa kapitolyo, Lunes, Disyembre 2, 2019, magarbuhong gipaila sa gobernador ngadto’s publiko sila Sean Mary Temple (Jasaan), Yanesse Culamat (Binuangan) Kristy Louise Marquino (Lagonglong), Sheena Balansag (Talisayan), Jeramie Mingo (Naawan), Alianah Jean Tumapon (Manticao), Danielle Arceo (Balingasag) Samantha Pauline Feranil (Gingoog City), Kyanns Zyra Awitin (Sugbongcogon), Bethel Amor Bullecer (Salay), Angel Talo (Medina) Jennifer Puno (Claveria), Kristine Angel Colaste (Villanueva), Esel Mae Pabillaran (Lugait), Briza Louise Ratilla (Magsaysay), Irish Claire Daug (El Salvador City) , Veronica Yvette Valdez (Alubijid), Fritzie Jean Naelga (Balingoan), Rechelle Mar Jabunan (Laguindingan), Crislyn Rose Acain (Initao), og Isobel Teano (Opol).

Ang lungsod sa Gitagum, Libertad, Kinoguitan ug Tagoloan walay representasyon. Wala mahibal-i ang tunhay nga rason, apan kahibaloan nga ang mayor sa upat ka lungsod kontra pulitika kono sa gobernador, mao nga wala magpadala ug kandidata, butang nga gikasubo ni Gobernador Emano.

Matud ni Provincial Tourism Officer Atty. Jeffrey Saclot, ning ikapito ka tuig nga silibrasyon sa Kuyamis Festival, sukad kini gitukod ni Gobernador Bambi, mas sadya, bibo ug alegre ang nagkadaiyang kalihukan atol sa kasaulogan.

“Ika pito na nato ni nga selebrasyon sa Kuyamis Festival, and for the information of everyone, Kuyamis Festival is the brainchild of no less than the father of Kuyamis, Governor Bambi Emano. So, wala ning Kuyamis Festival kung wala nahimong gobernador si Gob. Bambi,” saysay ni Atty. Saclot.

Ang Kuyamis Festival magsugod Enero 6 hangtud 11, 2020, duyog sa kasaulogan sa 90th Founding Anniversary kon sumad sa pagkatawo sa lalawigan sa Misamis Oriental.