Ang ENDO umiiral pa rin
Malaking porsyento sa ating mga kababayan ang malaki ang tiwala kay Pangulong Duterte. Iba siya kung mangako. Salitang lalaki. Ang pangako niyang susugpuin ang pagkalat ng droga ay tinutupad. Ang mabawasan ang korapsyon ay tinutukan din. Subali't itong tungkol sa ENDO ay mukhang naisantabi. Nasa 'back burner' ika nga.
Noon pa man ay naisulat ko na malaking suliranin ng mga kabataan ngayon ay ang walang halos kawalan ng oportunidad na makahanap ng matatag na hanapbuhay. May mga trabahong mapapasukan subali't hindi pangmatagalan at hindi permanente. Pagkatapos ng limang buwan, ENDO na.
Nasali na sa bokabularyo ang salitang ENDO, na ang ibig sabihin ay End of Contract. Marami sa mga kabataan, tapos sa kolehiyo, ang namamasukan at pagkatapos ng ilan buwan, pahinga, pwedeng bumalik sa dati o maghahanap ng ibang kumpanya. Pero ganoon pa rin. Limang buw ang pamamasukan. Ito na ang sistema sa kasalukuyan at parang tanggap na.
Noong mga dekada singkwenta, sisenta at hanggang sa panahon ni Pangulong Ferdinand Marcos, ang mga trabahador sa mga planta, mga despatsadora sa mga tindahan, mga empleyado sa mga tanggapang pribabo at sa iba't ibang uri ng hanapbuhay ay may security of tenure.
Halimbawa ang isang pahinante ng trak ng San Miguel Corporation pag natanggap bilang trabahador, bibilang na siyang taon hanggang sa maabot ang itinakdang edad sa pag-retiro. May mga benepisyong kamukha ng isang kabang bigas kada buwan, may Social Security System membership at iba't iba pang insentibo.
Hindi lang ang San Miguel Corporation ang may ganoong batas na sinusunod, kung hindi lahat ng negosyo, malaki o maliit man ay sunod sa batas ng Kagawaran ng Paggawa.
Ganoon ang sistema. Ganoon ang kalakaran, hanggang isang araw bigla na lang nagbago at mga hanay ng mangagawa ay hindi todo nag-ingay para labanan ang sistemang umiiral ngayon sa ganang akin ay hindi pabor sa mga mamayan, lalo na sa kabataan.
Isa ako sa maraming peryodista na pahingaan ang mga coffee shops sa mga malaking malls dito sa San Fernando at sa Angeles. At may pagkakataon magka-minsan na makausap ang mga empleyado ng malls nila Mr. Henry Sy, Mr. Lucio Co at Mr. John Gokongwei. Pare-pareho ang hinaing ng mga empleyado. Walang security of tenure. Mahirap mapermanente kahit gaano kagaling. Hanggang ngayon umiiral pa rin ang ENDO. Tw eet s: + Maraming mga kalat na balita tungkol sa paglaganap ng terorismo sa Pampanga. Huwag masyadong magpapaniwala sa mga ganitong balita. Pero kailangan mag-ingat at mapagmasid, ke totoo o hindi totoo itong mga balita.
+ Laki ng pagbabago sa hitsura ng Nepo Mart Area sa Lungsod Angeles. Kagandang pasyalan.
+ Ang mga malls ng SM lalo na itong nasa Lungsod San Fernando kailangan ng magtayo ng parking building na kahit tatlong palapag man lamang. Sobrang sikip na at walang ng mapaparadaan ang mga sasakyan.