HAMON SA PAGTUTURO
Dalhin man ako sa bundok, magtuturo at magtuturo pa rin ako”.Ito ang pahayag na aking nabasa sa isang pahayagan na pilit paring umuukilkil sa aking isipan.
Ang pagtuturo ay isang napakabigat na responsibilidad na nakaatang sa mga guro, isang bokasyon na hindi biru-biro, bagkus ito ay nangangailangan ng masusing pag-iingat sa bawat salita o pahayag na bibitawan ng guro.
Sa panahon natin ngayon, sinasabi nila na talo raw ng kompyuter ang mga guro. Sa aking paniniwala kailanman ay hindi madadaig ng kompyuter ang papel ng guro. Ano nga ba ang kaibahan ng dalawa? Ang kompyuter ay masasabi nating isang mdernong kagamitan na nakatutulong upang mapadali ang anumang gawain. Ngunit kahit sabihin pa natin isa itong mainam na behikulo,di parin niya mahihigitan ang isang guro,dahil ang kompyuter ay likha ng tao. Sa madaling salita, tao rin ang makakatalo sa kompyuter at ang kompyuter ay para ring robot na kung walang magmamaniobra ay hindi ito aandar. Hindi rin natin maitatatwa na mas magaling at mabisa pa rin ang mga guro kaysa sa kompyuter, sapagkat ang guro ay tao, may puso na marunong maawa, may damdaming lumilikha ng interaksyon sa mga mag-aaral at higit sa lahat may prinsipyong “tao sa tao”, “puso sa puso”.
Di lingid sa ating kaalaman na patuloy pa ring ang pagbabagong nagaganap sa ating bansa , tulad din ng paraan ng pagtuturo, maging ang ating kurikulum ay binago mula BEC, SEC, at ngayon K to 12, upang lalaong maging mabisa at epektibo ang kalidad ng edukasyon.
Kailan ba natin masasabi na epektibo ang isang guro? Masasabing epektibo ang isang guro, kung ginagawa niya ang kanyang tungkulin bilang isang guro, hindi lamang nagtuturo kundi inaakay ang mga mag-aaral tungo sa magandang landas na kanilang tinatahak.
Tooto ngang nakakaalarma ang mga pagbabagong nagaganap sa ating bansa, marami ng imbensyong nagsusulputan, mga makabagong paraan, teknik at pamamaraan sa pagtuturo. Nagiging “hamon” ito para sa atin upang lalo pa nating pagsumikapan at puspusang pagbutihin ang ating pagtuturo. Huwag tayong maging bulag sa mga pagbabagong ito, huwag nating ikulong ang ating sarili sa mga mali at lumang sistemang ating nakagisnan.