WIKANG SALIKSIK: LINANGIN
MARIETTA C. ESMORES
“AGOSTO: BUWAN NG WIKANG PAMBANSA.”
Isang taunang pagdiriwang ang isinasagawa tuwing sumasapit ang buwan ng Agosto. Ito ay nasa pangunguna ng Komisyon sa Wikang Filipino ( KWF ) alinsunod sa itinakdang Pampanguluhang Proklamasyon Blg. 1041, s. 1997. Sa buwang ito, ang tema ng pagdiriwang ay “Filipino : Wika ng Saliksik “na may layuning maganyak ang mga mamamayang Pilipino na pahalagahan ang Wikang Pambansa.
Ang paggamit ng sariling wika sa ating pang-araw-araw na pakikipagtalastasan ay napakalaking bagay sapagkat nabibigyan nating halaga ang isa sa mga gintong kayamanang ipinamana sa atin ng ating mga ninuno. Isang pamana na hindi mananakaw ng kahit sinuman dahil ito’y nagsisilbing daluyan ng komunikasyon upang tayo ay magkaunawaan. Higit pa rito, ito ang nagsisilbing pagkakakilanlan sa atin bilang isang lahing Pilipino.
Sa kasalukuyang tema ng Buwan ng Wika, ito ay nakapokus sa pagkilala sa Wikang Filipino bilang midyum sa paglikha at pagpapalaganap ng iba’t ibang larang ng karunungan at kaunlaran, lalong lalo na sa agham at matematika. Saliksikin natin ang ating wika, ang natatagong yaman nito. Gamitin ito bilang gabay sa pagtuklas ng makabagong kaalaman.
Bilang isang Pilipino, tayo’y nararapat nang magising. Magising sa panahong kinamumulatan natin. Tangkilikin ang ating sariling wika. Payabungin, palaganapin, at lalong paunlarin pa ito. Pahalagahan din gaya ng isang kayamanan. Kayamanang ipamamana at ibabahagi rin natin sa ating susunod na lahi at higit sa lahat, ito’y pakamahalin. Pakamahalin ang Wikang Filipino!
— oOo—
The author is Teacher III at San Isidro High School, Sta. Ana