NANG AKO’Y MANGARAP NA MAGING DARNA!

KATRINA L. SANTOS

“Gusto kong maging DARNA”, ang sagot ko ng ako’y tanungin ng aking ina sa usaping ano ang gusto ko na maging paglaki ko.

Noong bata ako, nangarap akong maging superhero sapagkat nais kong iligtas ang mundo laban sa mga masasamang tao. Ngunit,ang pangarap ko palang iyon ay sa mga komiks lamang mababasa ng ako’y mamulat at makatungtong sa paaralan. Bunga ng imahinasyon ng kapapanood ng mga teleserye sa television.

Dumating ang araw na ako’y makatungtong sa paaralan, namangha ako sa aking guro na nagturo sa akin na bumasa at magsulat. Ang aking guro sa Grade 1 na nagsilbing sandata ko laban sa kamangmangan, ang aking kasangga sa araw-araw na ako’y nasa paaralan. Tinuruan nya ako sa matematika, wika, sa pagsayaw at pagkanta. Siya ang humubog sa aking kamalayan upang maintindihan ang lahat-lahat sa mundong aking ginagalawan.Higit na nadagdagan ang aking kaalaman mula sa walang humpay na pagpapamalas ng kaalaman ng aking guro sa Grade 4. Siya ang nagbukas ng aking mga mata upang baguhin ko ang aking pangarap.

Ang aking pangarap ay tuluyang napalitan. Sa husay ng aking mga guro sa elementrya sa pagtuturo, naisambit ko na darating ang araw, ako’y magiging kagaya nila.

Hindi man ako lumilipad na gaya ni DARNA, nasasambit ng aking mga estudyante na ako ang kanilang SUPERHERO dahil naimulat ko sila sa katotohanan ng buhay sa aking mga kwento na mula sa teksto na may leksyon; sa pagtuturo sa kanila ng pagbasa; pagsulat at pagbuo ng mga makukulay na pangungusap. Walang humpay ang paghanga nila sa paggabay ko sa kanila upang makamit ang karunungan nais nilang makamtan. Kung gaano sila nagpapasalamt ay ganoon din ako nagpapasalamat sa aking mga guro na nagsilbing inspirasyon ko sa pagtahak ng landas na meron ako ngayon. Kagaya ni DArna, ako’y naging isang superhero sapagkat ako’y isang GURO.

— oOo—

The author is SST-II at Macabebe High School