AKO BILANG GURO SA FILIPINO
AL REZSAN BACLAYO YCO
Maraming nagsasabi na napakadali ng Filipino bilang isang asignatura na itunuturo sa paaralan. Maririnig mo pa ang isang magulang na ang kanilang anak ay bumagsak sa nasabing asignatura ang ganitong tanong, “Sir, bakit po bumagsak ang anak ko? Eh, Filipino lamang naman iyan!” Kung iisipin nga naman, karamihan sa mga magaaral ay sanay sa pagsasalita ng wikang Filipino na malaking adbantahe upang matuto sa asignaturang Filipino.
Ngunit bakit nga ba bumabagsak o nahihirapan ang mga mag-aaral sa asignaturang Filipino? Kung ako ang magsasalita bilang isang guro, nahihirapan ang mga magaaral dahil sa iba’t ibang mga kadahilanan na ako mismo ang nakapansin at tumuklas.
Hayaan niyong ilahad ko ang ilan sa mga ito, malaking katunggali ng mga katulad kong guro ang mga gadgets na kinahuhumalingan ng mga mag-aaral. Higit na marami ang oras ang inilalaan ng mga mag-aaral sa paggamit ng social media at iba’t ibang laro at apiksayon gamit ang internet.
Nariyan din ang paggamit ng mga pinaiikling salita sa kanilang pakikipagkomunikasyon, maging sa paggamit ng wastong bantas ay kalimitang nakakalimutan ng mga mag-aaral dahil imbis na gumawa ng takdang–aralin gamit ang libro at pagsusulat kinokopya nalang sa pamamagitan ng kompyuter. Naniniwala ako na hindi lamang ang asignaturang Filipino ang sumasabak sa ganitong sagabal kundi maging ang iba pang asignatura.
Madali lang naman talaga ang asignaturang Filipino kung pinaglalaanan ng pansin ang importansya nito. Marami kang matutunan hindi lamang ang pinagmulan ng wika kundi pati na rin ang kulturang nagpapakilala sa atin bilang isang Filipino. Nais ko sanang itanong sa magulang na kumwestyon sa marka ng kanyang anak kung ano ba ang ginagawa niya pagkauwi ng kanyang anak pagkagaling sa eskwelahan?
Dahil batid ko na bilang magulang ng isang bata kailangan maging kasangga ng mga guro ang mga magulang sa pagkatuto ng kanilang anak. Ako bilang guro sa Filipino ay hindi nawawalan ng pag-asa sa kabila na marami akong katunggali sa mga gawain at pinagkakahabalahan ng aking mga mag-aaral.
Sisikapin ko na magawa ang aking parte dahil alam ko na ang pagiging guro ay isang bokasyon na hindi magpapatinag sa anumang pagsubok na maaaring harapin ng isang guro sa Filipino. Tutulungan ko ang aking mga mag-aaral na pagsumikapang gawin ang kanilang makakaya upang maintidihan ang asignaturang Filipino.