ASIGNATURANG SARILING ATIN
Mabilis na lumilipas ang panahon kaakibat nito ang patuloy na pagbabago dulot ng modernisasyon. Bunga ng kaganapang ito sa ating paligid at lipunan, hindi maiiwasang unti-unting nalilimutan ang kabuluhan ng mga tradisyong kinagisnan at kinasanayan lalonglalo na ng mga kabataan sa makabagong henerasyon.
Ngunit may isang magandang pamamaraan upang mapanatiling bukas ang kamalayan ng mga kabataan sa ating kulturang iniingatan. Ito ay ang pagtuturo ng asignaturang Filipino. Sa pamamagitan nito ay nabibigyan ng sapat na kaalaman ang mga mag-aaral ukol sa ating wika at panitikan.
Sa pag-aaral ng Filipino ay napahahalagahan din ng wasto ang ating wika na bahagi ng ating kultura. Mahahasa ang kaniulang kaalaman at kakayahan sa pagsasalita ng Filipino. Nagkakaroon din ng matatag na pundasyon ng mga salita na magpapabatid sa atin ng maraming bagay ukol sa pagiging Pilipino.
Ang wikang Filipino rin ang nagsisilbing tatak at pagkakakilanlan ng ating lahi kaya mahalagang patuloy itong gamitin sa bawat aspeto ng ating pamumuhay lalo na sa pagaaral sapagkat dito nag-uumpisa ang pagkatutuo sa iba’t ibang larangan.
Sa asignaturang Filipino ay nagkakaroon ng kabatiran ang mga mag-aaral sa ating kasaysayan bunga ng pag-aaral ng panitikan na salamin ng ating lahi. Hindi maaring paghiwalayin ang dalawang ito sapagkat may kaugnayan sila sa isa’t isa. Nagiging daan ito upang malinang ang isipang makabayan ng isang kabataan.
Nabubuksan din ang isipan ng mga mag-aaral sa asignaturang Filipino ang kahalagahan ng bayang sinilangan sapagkat natatalakay rito ang pagmamahal ng ating mga bayani at ninuno sa ating Inang-bayan sa pamamagitan ng mga akdang kanilang nalikha na nagsilbing pamana nila sa kasalukuyang henerasyon. Nagiging daan ito upang lalong ipagbunyi at ipagmalaki ang ating pagka-Pilipino.
Kaya naman napakalaki ng gampanin ng isang guro sa Filiupino upang mapahalagahan ng lubos ng mga mag-aaral ang asignaturang ito. Kinakailangan gumamit ng mga estratehiya ang guro sa pagtuturo nito na hindi magiging kabagot-bagot bagkus ay pupukaw sa kanilang interes at kikintal sa kanilang diwa at isipan ang wika at panitikang mapagaaralan.
Ang mga guro sa Filipino ang maituturing na bayaning magpapaningning sa ating kulturang Filipino at magpapaunawa sa mga mag-aaral ng makabagong henerasyon sa wastong paggamit ng wikang Filipino na repleksiyon ng ating lahi upang mapagbuklod ang mga mamamayan ng ating bansa dahil sa ating wikang sinasalita. Sila rin ang magbibigay ng kabuluhan sa ganda at yaman ng bansang Pilipinas sa pamamagitan ng mga panitikang maipagmamalaki kaninuman.
Nararapat lamang na mapahalagan at matutuhan ng mga kabatan sa henerasyong ito ang asinatutang Filipino sapgkat ito lamang ang asinaturang matatawag na sariling atin.