Kahirapan: Hindi Hadlang sa Pagkamit ng Pangarap
Lesley A. Angeles
“Hindi hadlang ang kahirapan upang magtagumpay”. Kasabihang ginagawang motibasyon ng tao upang makamit ang mga pangarap. Pangarap na mapabuti ang buhay, hindi lamang para sa sarili kundi para na rin sa mga mahal sa buhay. Mga taong nagiging inspirasyon upang patuloy na magsikap sa lahat ng larangang tinatahak. Nagiging sandigan sa lahat ng pagsubok na nararanasan. Kung kaya ganoon na lamang ang pagnanais na matupad ang kanilang mga pangarap. Gaano nga ba kahalaga ang pagtatagumpay para sa pamilya?
Maraming pamilya ang may kakayahan na papag-aralin ang kanilang mga anak dala ng kanilang estado sa buhay. Mga magulang na nagsisikap nang husto upang maibigay ang lahat ng pangangailangan ng kanilang mga anak na minsan ay nagiging dahilan upang mawalan ng panahon sa mga ito. Sa pag-aakalang sapat ang kanilang ginagawa ay nalilimutang kamustahin man lamang ang kanilang mga inspirasyon. Minsan ay hindi nauunawaan ng mga anak ang dahilan ng kawalan ng panahon sa kanila ng mga magulang kung kaya sila ay nagpapabaya sa pag-aaral upang mapansin. Nakalulungkot isipin na kung sino pa ang may kakayahan na makapag-aral ay sila pa ang nawawalan ng interes dito.
Dapat nating malaman na hindi lahat ng nag-aaral ay nabibilang sa nakaririwasang pamilya. Ang ilan sa kanila ay mga mahihirap na nangangarap na makatapos ng kurso upang magtagumpay. Ginagawa ang lahat upang makamit ang tagumpay sa kabila ng kahirapang nararanasan. Tagumpay na magdadala sa kanila sa panibagong buhay. Tagumpay na mag-aahon sa pamilya sa kahirapan. Kung kaya ganoon kahalaga ang tagumpay para sa isang mahirap, sapagkat dito nakasalalay ang kanyang kinabukasan.
Ilan sa mga paraang ginagawa ay ang pamamasukan sa gabi at pag-aaral sa umaga. Ika nga ng iba kung ayaw maraming dahilan, kung gusto maraming paraan. Dahil sa kanilang pagpupursigi at determinasyon ay maluwalhati nilang naisasakatuparan ang mithiin ng puso.
Kung ating susuriin ay may katotohanan ang kasabihang nabanggit tungkol sa pagtatagumpay. Sa tao nakasalalay ang kanyang kahihinatnan. Maging tamad at mapagwalang bahala, walang pag-unlad na mapapala. Sa kabilang banda, mangarap at magsikap, ang mithiin ng puso ay magaganap.
--oOo-
The author is Teacher III at Angeles City Science High School