K to 12 Dagdag Pasakit nga Ba?

Lesley A. Angeles

Sa pagpasok ng kurikulum ng K to 12 sa Pilipinas, marami ang hindi nasiyahan, nagtanong at naguluhan . Iba’t ibang opinyon ang naglabasan, may positibo at negatibo. May nag-isip na ito ay dagdag pasakit kapwa sa magulang at mag-aaral. Dagdag gastos at panahon upang makatapos ng hayskul,isang kalokohan ang pagpapahaba ng panahon ng pag-aaral sa hayskul. Bakit nga ba ganito ang reaksiyon ng mga tao sa bagong kurikulum?

Nakamulatan ng mga matatanda ang sistema ng edukasyon na anim na taon sa elementarya at apat na taon sa sekondarya. Kaya sila ay nagulumihanan sa pagdating ng kurikulum ng K to 12. Sapagkat nakasaad dito na ang hayskul ay dadagdagan ng dalawang taon na tinawag na Senior High School. Ang pamahalaan ay nagsagawa ng pag-aaral sa sistema ng ating edukasyon at natuklasan na iilan na lamang pala tayong bansa na gumagamit ng sampung taon sa pag-aaral ng hayskul. Sa paghahangad na makasabay sa pag-unlad ay minabuti ng pamahalaan sa pangunguna ni Pangulong Benigno Aquino III na lagdaan ang enhanced Education Act of 2013 noong Mayo 15,2013. Ayon sa pananaliksik ay panahon pa ni Pangulong Manuel L. Quezon ito unang ipinanukala subalit ngayon lamang naisakatuparan.

Layunin ng K to 12 na mapahusay ang kasanayan , karampatang kakayahan at pagkakaroon ng panghabambuhay na pagkatuto ng mga mag-aaral na magtatapos. Ang Senior High School ay binubuo ng apat na Tracks ; Academic, Technical,Vocational, Livelihood (TVL) , Sports at Arts and Design. Sa pagtatapos ng Senior High School ay may tatlong maaaring kahantungan ang mga mag-aaral; kolehiyo, hanapbuhay at negosyo. Sapagkat sa pagtatapos nila ng hayskul ay nasa hustong gulang na para sa mga ito. Ang academic track ang pinipili ng mga mag-aaral na may layuning magpatuloy sa kolehiyo. Nabibilang dito ang Science ,Technology , Engineering and Mathematics (STEM), Humanities and Social Sciences (HUMS), Accountancy, Business and Management (ABM) at General Academic Strand (GAS). Ito ang mga bagay na hindi nauunawaan ng ibang magulang dahil sa kakulangan ng oryentasyon kaugnay ng nasabing kurikulum. Hindi sapat ang kanilang kaalaman na kung wala kang interes sa pag-aaral sa kolehiyo ay maaari ka namang magnegosyo o magtrabaho basta nasa Technical, Vocational, Livelihood (TVL) Track ka sa Senior High School. Dahil dito ay nalilinang ang kakayahan ng mga mag-aaral sa mga praktikal na bagay gaya ng pagbebeyk, pagwewelding , pagluluto at iba pa. Nangangahulugan na hindi lamang ang mga magkokolehiyo ang may kakayahang umasenso sa buhay. Dahil lahat ng mag-aaral ay binibigyan ng pagkakataon na mamayagpag sa larangang kanilang napili.

Kung iniisip ng iba na ito ay pasakit lamang ay maaaring mabago ang kanilang isipan kapag lubusan na itong naunawaan. Ito ay maisasakatuparan lamang sa pamamagitan ng malawakang oryentasyon sa mga magulang ukol sa nilalaman at kahalagahan ng kurikulum ng K to 12 sa pangunguna ng mga paaralan. Gayonpaman , kung ito ay nagawa na at mayroon ka pang hindi naiintidihan ay maaari kang magsadya sa paaralan upang mas maliwanagan ang mga bagay-bagay. Kung isa ka sa mga gustong magtanong, ano pa ang hinihintay mo? Tara na!

--o0o-

The author is Teacher III at Angeles City Science High School