Pagsulat ng Liham
Jeffrey L. Sanchez
Isang paraan ng pakikipagkomunikasyon o pakikipagtalastasan ang pagsulat ng liham. Noon, binibigyang-pansin ito ng mga mamamayan, kahit pa ng kabataan, sapagkat ito ang natatanging linya ng pakikipagkumustahan at korespodensiya. Sa pamamagitan ng liham, naipaaabot ang mahalagang impormasyon, naipararamdam ang saloobin at personal na nakakausap ang pinagdudulutan ng nito.
Upang maging epektibo ang pagsulat ng liham, iminumungkahi ang sumusunod: 1. Magkaroon ng pokus. Kailangang ituon ang nais sabihin o maging laman ng iyong liham. Huwag hayaang magsalimbayan ang isipan sa kung ano-anong paksa o gawain ang gusting isakatuparan.
2. Organisahin ang iniisip. Lahat ng gustong iparating na mensahe sa iyong susulatan ay kailangang buoin nang maayos. Ang mga impormasyon ay dapat na isa-isahin at timbangin ayon sa halaga nito.
3. Tiyakin ang nasa isip. Dapat na maging ispesipiko ka sa iyong isusulat. Maging sandigan mo ang layunin mo sa pagsulat.
4. Maging malinaw sa paglalahad ng mga ideya o kaisipan. Maging direkta ang pagpapakahulugan sa iyong nais ipahayag. Iwasang magkaroon ng malabong kaisipan ang laman ng iyong liham upang maging ganap ang pagkaunawa ng bumabasa.
Sa pagsulat pa rin ng liham, kailangang mataglay nito ang pitong katangian upang magtagumpay ang sumulat sa kaniyang layunin. Isaang-alang ang sumusunod:
1. Malinaw. Ayusin ang mga impormasyon o kaisipang nais ipabatid ng liham. Magkaroon ng plano sa pagkakasunod-sunod ng mga ito. Suriin ang pagkakasulat ng bawat pahayag na hindi dapat na maging mahaba o maligoy. Maging tiyak sa nais ipaabot na upang huwag malito ang pinaghandugan ng liham.
2. Wasto. Kailangang magtaglay ng angkop at wastong impormasyon ang iyong liham upang makatiyak ka na ito’y kaniyang mauunawaan at matutugunan. Maging tama dapat ang pagkakalapat at pagkakapahayag ng iyong kaisipan. Isaalangalang ang balarila, palabaybayan at ang paggamit ng wastong bantas.
3. Buo. Tiyaking ang lahat ng mga impormasyong nais ipabatid ay kumpleto upang hindi ito maging depektibo. Pagsama-samahin ang datos o kaisipan upang walang makaligtaan.\
4. Magalang. Mahalagang maramdaman ng sinusulatan ang pagpipitagan sa kaniya. Ilapat nang maayos at katanggap-tangap ang himig ng liham. Hindi dapat makita na ang liham ay may pagkamayabang, nakabibigla, nakagagalit at kababanaagan ng kawalan ng mabuting asal. Nakatatawag ng pansin ang pagkamagalang nito kaya’t nakukuha nito ang kagyat na tugon o reaksyon.
5. Maikli.Laging sikapin na lahat ng nasusulat ay nakatutulong sa mga pahayag o kaisipan. Huwag maglagay ng mga hindi mahahalagang detalye sa liham sapagkat nakapapawi ito sa interes ng mambabasa.
6. Kumbersasyonal. Maging natural sa pamamaraan ng pagsulat na tila ikaw ay nakikipag-usap lamang sa kaniya nang personal. Gumamit ng sariling pananalita at iwasan ang matayutay o maliligoy na pananalita.
7. Mapagsaalang-alang. Ikonsidera ang sinusulat sa liham. Bigyang-pansin ang mensaheng nakapagbibigay ng interes sa kaniya. Maging mapagbigay upang maipadama sa bumabasa ang pagtitiwala at kagandagang-loob.
Sandigan: