GAWA HIGIT SA SALITA

Clara C. Dela Cruz

Isang umaga habang ako ay nakasakay ng bus, sa aking pagkakapikit hindi sinasadyang napakinggan ang dalawang matandang babae sa aking likuran na nagkukwentuhan sa kani kanilang buhay, tungkol sa sarili, sa kalusugan at sa pamilya. Napukaw ang aking damdamin sa naturan ng isa tungkol sa kanyang manugang.

Ayon sa kanya maganda ang kanilang samahan, maayos ang pakikipagusap at walang bangayan sa kabila ng magkasama sila sa iisang bubong. Sabi nya may mga pagkakataon na meron siyang nakikitang kamalian sa manugang ngunit hindi nya ito binabangayan , sa halip ay itinatama nya ito sa pamamagitan ng aksyon, sa pagkakataon na hindi nakikita ng manugang. Halimbawa na lang kung nakasanayan ng manugang ang basta na lang pagtatapon ng balat ng pinagkainan o sachet ng shampoo sa banyo , pupulutin ng matanda ito at itatapon sa tamang lalagyan. Sa gayon ay malalaman o matutunghayan na lang ng manugang na hindi tama ang ginawa nya at gagawin na rin kung ano ang nakitang tama.

Simpleng bagay ng pagtuturo na maaari nating gayahin, sa ating mga anak o sa ating mga estudyante “Action speaks louder than words “ika nga. Sa ganang akin ay maaari nating gawin ang ganitong paraan, ang maging magandang halimbawa sa mga bata upang mapahusay ang kanilang ugali at madisiplina ang sarili. Kung anong nakikita ng mga bata na ginagawa ng mga nakakatanda sa kanila ay siya nya ring gagawin o gagayahin. Isang paraan ng pagkakaunawaan ng bawat isa na walang ingay at walang away.

--oOo-

The author is Secondary School Teacher III at Angeles City National High

School