PAGLAGGANAP NG WIKANG FILIPINO SA PANAHON NG PANDEMYA
Hinaharap natin ang kasalukuyang pagsubok sa lipunan dulot ng pandemya. Ang krisis sa COVID-19 ay isang dagok na patuloy na nagpapahirap hindi lamang sa kabuhayan at kalusugan ng mga mamamayan kundi sa kabuuan ng ekonomiya ng bawat bansa sa buong mundo. Sa pang-araw-araw na pamumuhay, umaga pa lamang ay laman na ito ng balita mapa telebisyon, radyo at dyaryo. Inaabangan ng mga tao ang bilang ng mga naging apektado sa virus na ito. Gayundin ang mga naglilingkod sa gobyerno ay patuloy na nagbibigay ng mga bagong impormasyon sa mga nagaganap sa bawat lugar upang maging bukas sa lahat ang anumang sitwasyong kinahaharap ng mga tao. Walang tigil ang pagbibigay ng kaalaman sa mga tao upang mapangalagaan ang kalusugan at makaiwas sa pagkahawa rito.
Sa ganitong sitwasyon ang wika ay may mahalagang ginagampanang tungkulin sa pagpapalaganap ng mga kaalamang ito sa masa. Ginagamit na instrumento ang wikang Filipino upang higit na maunawaan ang mga anunsyo o anumang mga impormasyon na aabot sa pinakamaliit antas ng tao sa lipunan. Gamit ang iba’t ibang uri ng media at makabagong teknolohiya ay naipararating sa mga mamamayan ang balitang kailangang malaman. Ito ngayon -kinalaman sa pandemiyang ito.
Maging sa larangan ng edukasyon ay di rin tumitigil ang paglagganap ng wikang Filipino bagamat di na ito tulad ng dati ay nakagagawa pa rin ng mga paraan upang maipaabot ang mga plano ng Kagawaran ng Edukasyon sa mga mag-aaral sa pamamagitan ng iba’t ibang kagamitan na ginagamit ang wikang Filipino bilang midyum ng komunikasyon upang higit na maging malinaw ang mga impormasyon hindi lamang sa mga mag-aaral kundi maging sa mga magulang.
Tunay ngang ang wika ay buhay at walang tigil sa pag-unlad. Hindi mapipigilan ang paglawak nito sapagkat ito’y may malaking gampanin sa buhay ng tao at sa lipunang ating ginagalawan. Sa pamamagitan ng wika ay naipahahayag natin ang ating saloobin at naipararating ang mga impormasyong nais na maibahagi. Minsan nga’y nakabubuo pa ng awitin, tula maging kasabihan na nakaangkla sa kasalukuyang krisis. Di rin naman maikakaila na ang mga ito’y patok at tinatangkilik ng mga tao sapagkat nakasabay sa uso lalong- lalo na ang walang humpay na pagtitik-tok na talaga namang sikat sa lahat mapa-bata man o matanda.
Nabawasan man ang pakikipag-usap natin sa mga tao sa ating paligid. Nalimitahan man ang harapang pakikipagkomunikasyon gawa ng pag-iingat sa ating sariling kalusugan. Nakontrol man ang kalayaang lumabas at magsaya kasama ang pamilya’t kaibigan hindi naman maitatanggi na hindi mapipigilan ang pag-unlad at patuloy na paglaganap ng wika kahit sa ganitong kalagayan sapagkat ang wikang Filipino ay patuloy na ginagamit sa iba’t ibang larangan na may iba’t ibang kapamaraanan.