IMPLUWENSIYA NG LINGUA FRANCA SA ONLINE NA PAGNENEGOSYO

Roselle P. De Jesus

Ayon kay Chinkee Tan na isang Financial Adviser, “Hindi lang pag-popost ng sariling status at travel updates ang pwedeng gawin sa Facebook. Posible ring yumaman kung gagamitin rin ito sa negosyo”. Lalong sumikat ang online na pagnenegosyo ngayong panahon ng krisis, kabi-kabilaan ang mga nagbebenta ng iba’t ibang produkto. Tunay ngang malikhain ang mga Pilipino “kumikitang kabuhayan ika nga “sapagkat kahit sa ganitong pagkakataon ay hindi magpapatinag ang mga Pinoy dahil gagawa at gagawa ng paraan para mabuhay. Sinasamantala ang pagkakataon na bawal lumabas ang mga tao kaya sa online na lamang ang transaksiyon sa pagbili ng anumang kailangan.

Ano nga ba ng lingua franca na ginagamit sa online na pagnenegosyo? Ang lingua franca ay ay galing sa pinaghalong Pranses at Italyano na ginamit ng mga mangangalakal at kruseyder noong 11th at 12th na siglo. Ito ay wikang komon, wikang pantulong sa komunikasyon ng taong may sari-sariling mga wikang katutubo. (Sitwasyong Pangwika ng Pilipinas hango mula sa http://www.ethologue.com/country/PHRason)

Maraming wika ang umiiral sa bansa mula sa iba’t ibang etnolingguwistik na pangkat. Ang mga wikang ito ay may iba’t ibang diyalekto rin na ginagamit sa bawat lugar sa probinsiya. Ang kahulugan ng isang salita sa isang probinsiya ay maaaring mag-iba naman sa ibang probinsiya. Ito ang dahilan kung bakit kailangang magkaroon ng isang wika na magbubuklod sa mga tao upang maiwasan ang hindi pagkakaunawaan. Ang Filipino ang lingua francang nasyonal na ginagamit natin sa bansa. Ito ang nagbubuklod sa mga Pilipino upang magkaintindihan sa lahat ng pagkakataon. Sa pamamagitan ng paggamit ng Filipino ay nagiging madali sa bawat isa ang pakikipagkomunikasyon.

Sa larangan ng online na pagnenegosyo sa Pilipinas nagiging madali ang transaksiyon sa pagitan ng seller at buyer dahil sa paggamit ng wikang Filipino bilang lingua franca. Hindi nagiging hadlang ang probinsiyang pinagmulan para hindi magkaintindihan sa larangan ng pangangalakal gamit ang makabagong teknolohiya. Sa patuloy na paggamit ng wikang Filipino bilang lingua franca sa online na pagnenegosyo, ang wika ay patuloy na umuunlad at lumalawak. Ito rin ay daan upang magkaunawaan maging sa kultural na pagkakaiba ng bawat Pilipino mula sa pagkain, pananamit, paniniwala at marami pang iba.

--oOo-

The author is SHS - Teacher III at Francisco G. Nepomuceno Memorial High

School