Pagbabaybay at Pagbabantas: Mahalaga pa ba?
Roselle P. De Jesus
Sa panahon ngayon ang paggamit ng makabagong teknolohiya ay laganap na sa lahat ng uri ng tao at antas ng pamumuhay. “Digital world” ika nga ng iba. Marami itong magagandang epekto na naidudulot sa tao lalo na pagdating sa pagpapadali ng mga gawain. Kailangang maging maalam sa paggamit ng iba’t ibang gadyet upang makasabay sa panahon ngayon. Sa kabilang banda ay marami rin itong negatibong epekto sa tao. Isa na rito ang paggamit ng tamang baybay at bantas sa pagsulat. Instant na lahat kaya maging sa ispeling ay madalian na lamang ang pagsulat. Tulad na lang sa pagsulat sa text na kaysa isulat ang salitang okey ay k na lamang ang isinusulat, kaysa sa sige ay cge na lamang ang ginagamit. Ito ngayon ang malaking hamon na kinahaharap ng mga guro ng wika sa mga mag-aaral na nahuhumaling sa paggamit ng mga gadyet at higit na ninanais na makasabay sa uso kaya pati ang tamang pagsulat na itinuturo sa paaralan ay ipinagwawalang bahala.
Ang sabi ng marami di bale na mali ang baybay at bantas sa pagsulat ang mahalaga ay naiparating ang ibig sabihin sa taong kausap. Sa pagkakataong ito ay hindi nagagamit nang tama ang wika. Kapag hindi nagamit nang wasto ang wika ay maaaring hindi maihayag nang maayos ang nais na sabihin kaya nagkakaroon ng di pagkakaunawaan o pagkakaintindihan. Bagamat hindi naririnig ang kausap sapagkat ito’y sa paraan ng pasulat, mararamdaman pa rin ang emosyon na nais iparating kung tama lamang ang paggamit ng bantas maging ng ispeling sa pagsulat.
Ang mga patakarang ito sa wika ay itinuturo na mula sa simula ng pag-aaral ng mga mag-aaral. Ito ang mga pundasyon na ginagamit sa mabisang pagsulat ng iba’t ibang mga sulatin. Ito ngayon ay isang malaking hamon sa kasalukuyang panahon lalong- lalo na sa mga guro ng wika sapagkat ang kasanayan sa pagsulat ay marapat na malinang nang mabuti sa mga magaaral. Ito ay magagamit upang magkaroon ng mabisang komunikasyon at maiiwasan ang di pagkakaintindihan.
Mahalaga ang wika sa buhay ng tao. Ang paggamit nito sa iba’t ibang sitwasyon ay nangangahulugan ng patuloy nitong pag-unlad. Kaya naman higit na magiging kapaki-pakinabang ang paggamit nito kung gagamitin ito nang tama sa paraang pasalita man o pasulat.
--oOo-
The author is SHS- Teacher III at Francisco G.
Nepomuceno Memorial High School