Walang Sariling Atin
Katherine Sebastian Cunanan
Kahibangan kung maituturing ang pagkakaloob ng Pangulong Rodrigo Duterte ng “absolute pardon” sa Amerikanong sundalo na si Joseph Scott Pemberton matapos nitong maabsuwelto sa kasong homicide sa ating kababayan na si Jennifer Laude, isang transgender woman. Humigit kalahati lamang ng dapat ay sampung (10) taon na sintensiya ang tinamasa ng banyaga, dagdag pa rito ang mala-bisitang pagtrato sa kaniya sapagkat imbis na mabilanggo sa regular na piitan ay nadetina ito sa pasilidad na gwardiyado ng Bureau of Corrections sa Philippine Military Headquarters, tulad ng nasasaad sa US-Philippines Visiting Forces Agreement. Matatandaang natagpuan ng motel staff na mala-lumpiang binalot gamit ang bed sheet ang katawan ng biktima habang ang ulo nito’y nakadukdok sa toilet bowl, aminado ang dayuhan na sinakal niya si Laude hanggang tuluyan itong mawalan ng hininga.
Kalakip ng absolute pardon na ito ang pagkawala ng criminal record ng naaresto sa kaniyang NBI clearance, hindi ba ito maituturing na kalabisan at hindi patas para sa ating kapwa Pilipinong bilanggo na gaya ni Pemberton ay pasok din sa ilalim ng Good Conduct Time Allowance (GCTA) rule? Hindi ito makatarungan. Tila naulit na naman ang kasaysayan dahil naibenta na namang muli ang ating soberanya sa ibang bansa, naipagbili na naman ang Pilipinas sa Amerika. Ngunit ang tanong ngayon ay kung ano ang kapalit na ating matatanggap o marahil isa ba ito sa kabayaran sa ipinautang na $2-B pambili ng mga armas ng US?
Naapakan ang dignidad ng mga kasapi ng LGBT Community kaya’t gaano na lamang kalakas ang loob ni Pemberton na tawaging “act of compassion” pa ang nangyari? Tama ang pagtutol ng mga Human Rights Group sa winika ni Harry Roque na isang ligtas na lugar pa rin ang Pilipinas para sa sa mga miyembro ng LGBT. Paano nakakayang sabihin ng ilang opisyales ng militar na pagpapatunay itong walang nakatataas sa batas kung ang mga desisyong ginagawa ng gobyerno ay pabor sa mga dayuhan at mas pinahahalagahan ang diplomasya kaysa makabayang diwa? Ito na marahil ang makabagong paraan ng pagtataksil sa bayan.
Ayon kay Virginia Lacsa-Suarez, abogado ng pamilya Laude, nag-iwan umano ng sulat ang Amerikanong sundalo kung saan nahahayag ang pagsisisi nito sa kaniyang nagawa sa biktima. Duda ang kampo ni Laude sa sinseridad ng mensaheng ipinahahatid nito dahil posibleng isang palabas na lamang ito upang masabing maayos ang pinagdaanang proseso ng pagpapalaya sa banyaga. Iginiit pa ni Suarez sa isang panayam sa TeleRadyo na nangako umano ang Pangulo sa ina ng biktima na si Julita sa naganap na pag-uusap noong 2017 na hindi makalalaya ang noo’y nasasakdal na si Pemberton sa ilalim ng kaniyang administrasyon.
Isa rin ba itong divertion tactic ng gobyerno upang mapagtakpan ang kapalpakan nito sa pagtugon sa pandemya o isang negosasyon upang maisalba ang bansa sa paparating na digmaan? Tayo ay mga “Pilipinong dayuhan” na pinagkakaitan ng makataong hatol at pangalawa lamang sa mga “dayuhang katutubo” na prayoridad ng pamahalaan.
Kailan kaya ang panahon na tayo’y uunahin? Palagi nalang din kasi tayong hinuhuli. Kawawa ang susunod na henerasyon kung ganito ang kanilang kalalakhang pagtrato
The author is Teacher
--oOo-
II at Pampanga High School