“Kabisaan sa mga Kagamitang Pampagtuturo”
Estepilyn P. Garcia
Ang pagkakaroon ng kalidad ay isang matibay na pundasyon upang mapanatili ang pag-unlad ng edukasyon. Ang mga guro ay may malaking papel sa paglilinang ng kaisipan ng mga kabataan. Anupa’t kinakailangan din na ang guro ay malikhain sa paggawa ng mga iba’t ibang kagamitan sa pagtuturo at paglikha ng mga pagbabago o inobasyon. Kailangan makipagsabayan sila sa mabilis na pag-unlad, kaalinsabay sa pagsulputan ng mga makabagong teknolohiya (Bernales 2014). Ang edukasyon ay isang mapanghamong propesyon lalo na ang pagtuturo sa kasalukuyang pandemyang dulot ng Covid-19. Kung ano ang ituturo (nilalaman) ay hindi lamang ang pangunahing iniisip ng guro sa kanyang pagtuturo, kundi maging ang paraan kung paano ito ituturo at matututuhan ng kanyang mga mag-aaral.
Kaya nga, hindi nasusukat ang kahusayan ng guro sa dami ng kanyang naituturo kung hindi sa kalidad ng natutunan ng kanyang mga mag-aaral. Napakaraming pinaplano ang guro bago isagawa ang aktuwal na pagtuturo. Isa na rito ay ang mga kakailanganin niyang kagamitang pampagtuturo. Tinatawag na kagamitang pampagtuturo ang anumang bagay o sitwasyon na ginagamit ng guro, na nakatutulong sa proseso ng pagtuturopagkatuto. Ginagamit ito upang maging maayos, madali, at nakaaaliw ang pagkatuto sa mga aralin. Samakatuwid, nagiging kongkreto, dinamiko, at ganap ang pagkatuto sa tulong ng mga kagamitang ito na nakaayon sa 21 siglong pagtuturo at pagkatuto. Ang mga sumusunod ay ang mga halimbawa ng mga kagamitang Pampagtuturo.
1. Sanayang Aklat - Ang pag-aaral na gamit ang sanayang aklat ay isinasagawa upang mabigyang kasagutan ang mga gawain na inihanda ng guro.
2. Modyul - Ang pagtuturo gamit ang modyul ay nakatutulong sapagkat karaniwan itong madaling sagutin. Nakatutulong din sa kawilihan ng mga mag-aaral ang mga larawan at napapanahong isyu na nakapaloob sa mga pagsasanay.
3. Self Learning Kit - Ito ay kagamitan ng mag-aaral na naglalaman ng isang aralin na isinulat sa paraang madaling mauunawaan at magagawa. Ang kasanayan sa SLK ay maituturing batay sa mga realidad ng buhay.
Ang bisa ng mga kagamitang pampagtuturo ay nakakamit lamang kung alam itong gamitin ng guro sa tamang paraan at panahon. Mahalagang maisaalang-alang ito ng isang tagapagturo.
The author is Teacher
--oOo-
III at Angeles City National High School