Nanay ko – Guro ko

Maria Luz B. Pineda

Masasabing mula pa noong sinaunang panahon, bago pa man tayo nagkaroon ng pormal na edukasyon na dala at ipinamna sa atin ng mga dayuhan na nanirahan sa ating bansa, ay may sariling paraan na tayo ng pagkakaroon ng edukasyon na kung saan ang ating mga magulang ating mga guro at ang ating tahanan ang siyang nagsilbing ating paaralan. Kung kayat’t pinaniwalaang “ang mga magulang ang pinakaunang guro ng kanilang mga anak”.

Marahil ay tama nga .Magulang ang nagsilbing guro nila mula pa pagkasilang hanggang bago pa man sila tumuntong sa paaralan upang magkaroon ng pormal na edukasyon. Mga magulang ang nagturo sa kanilang mga anak ng ibat-ibang kasanayan tulad ng pagbigkas ng ibat-ibang mga tunog ng mga titik, salita, pagawit at pagbilang. Hindi rin natin maikukubli o maikakaila na kahit magpahanggang ngayon, na pumapasok sa mga paaralan ang kanilang mga anak ay patuloy parin nilang ginagabayan ang mga ito sa pag-aaral makamit lang ang magandang edukasyon.

At ngayon tayoý humaharap sa isang napakalaking pagsubok dulot ng pandemyang COVID 19, muli natin mapapatunayan ang malaki at napakahalagang kontribusyon ng ating mga magulang sa pagsulong ng edukasyon sa bansa.

Sa sitwasyong nararanasan natin ngayon na kung saan ipinagbawal ang pagkakaroon ng “face to face classes”, hindi muna makapapasok ang mga magaaral sa paaralan upang makapag-aral. Ngunit hindi nangangahulugang hihinto sila sa kanilang pag-aaral. Maaari pa rin nilang ipagpatuloy ito sa kani-kanilang mga tahanan. Ang bawat mag-aaral ay mabibigyan ng mga gawaing pampaaralan na kanilang sasagutin sa ilalim ng masusing paggabay ng kanilang mga magulang.

Dito binibigyang diin ang kahalagahan ng gampanin ng isang magulang sa patuloy na pag-usad ng karunungan ng bawat bata sa bansa.

--oOo-

The author is Teacher III at Calulut Integrated School, Division of City of San

Fernando (P)