3Bs-Bawat Bata Bumabasa
Eduardo C. Benitez Jr. PhD
Ang bawat isa ay nakikiisa sa paghubog ng kasanayang pagbasa ng ating mga mag-aaral na Pilipino. Ang mga hamon na bunga ng pandemya ang siyang lalong nagpasidhi ng hangarin ng bawat guro at administrador upang maturuang magbasa ang mga bata. Ang kasanayang ponolohikal ay pundasyon ng pagkaalam ng wika sa pamamagitan ng pakikinig. Ang kasanayang ponema naman ay tumutukoy sa kakayahang maitunog ang mga letra hanggang sa ang bata ay makapagbasa na samantalang ang tatas naman ay may kinalaman sa tamang bilis ng pagbasa ayon sa mga pamantayan ng wika. Ang mga ito ay bahagi ng Reading Pyramid na nagsisilbing pundasyon bago mahubog ang kamalayang talasalitaan at pakahulugan.
Sa ikaanim na baiting, inaasahan na ang mga mag-aaral ay nakakabasa na ng may tamang tatas, naiintindihan ang mga talasalitaan, nakakasagot ng mga katanungang may kinalaman sa tekstong binasa, nakapagbibigay hinuha at higit sa lahat ay nakakapagbasa ng may pang-unawa. Ito ay mga kasanayang dapat na maituro sa ating mag mag-aaral bilang sapat na kaalaman upang mas matuto ng mataas na antas ng kaaalaman.
Napakahalaga ng papel na ginagampanan ng mga guro sa Filipino. Hindi lamang sa pamamaraan ng pagtuturo kundi maging sa paghihikayat sa mga mag-aaral na bumalik sa pagbabasa ng mga libro imbis na gumamit ng mga gadgets at maglaro buong hapon. Isang napakalaking hamon sa larangan ng edukasyon na makuha ang atensyon ng mga mag-aaral at maibalik sila sa kultura ng pagbabasa. Kaya naman hinihikayat ang bawat guro na maging malikhain sa pagpapakilala ng mga kwento o teksto namakakapukaw sa interes ng mga mag-aaral.
--oOo-
The author is Teacher III at San Fernando Elementary School- Division of
City of San Fernando