KAKAYAHAN NG MGA GURO SA FILIPINO: SUSI SA PAGPAPAYAMAN NG KAALAMAN SA GRAMATIKA NG MGA MAG-AARAL

REY MARK A. IBAY

Ang pag-aaral na ito ay naglalayong matukoy ang antas kakayahan ng mga guro sa Filipino at kung paano ito nagiging susi sa pagpapayaman ng kaalaman sa Gramatika ng mga mag-aaral. Konteksto ng pag-aaral ang mga ginagawa ng mga guro sa pagtuturo ng Filipino at ang mga pagtugon sa pangangailangang kakayahan sa Gramatika.

Isinagawa ang pag-aaral sa mga paaralan ng ika-7 Klaster ng Sangay ng Pampanga. Ginamit ng mananaliksik ang metodong palarawang paraan upang matukoy ang antas ng kakayahan ng mga guro sa Gramatikang Filipino. Ginamit ang talatanungang pagsusulit sa pagtukoy sa kakayahan ng mga guro sa Morpolohiya at Sintaks, at ang talatanungang sarbey sa paglikom ng datos hinggil sa mga pagsisikap at Smga pagtugon sa pangangailangan ng mga guro sa pagpapayaman ng kaalaman sa Gramatika ng kanilang mga mag-aaral at sa pagpapataas ng kanilang kakayahan sa Gramatika. Ang dalawang talatanungan na ito ay instrumentong binuo ng mananaliksik at hinango ang mga aytem ng pagsusulit sa mga awtor na kapwa dumaan sa proseso ng balidasyon sa mga batikang guro sa Filipino ng ibang klaster. Apatnapu’t siyam (49) na mga guro sa Filipino ang kabuuang bilang ng mga tumugon sa nasabing talatanungan.

Natuklasan sa pag-aaral na nasa katamtamang husay ang antas ng kakayahan ng mga guro sa Gramatika na may promedyong 2.65. Sa Morpolohiya, natamo ng mga guro ang promedyong 4.12 na may deskriptibong interpretasyon na mataas at nangangahulugang mahusay. Samantala, nakuha naman sa Sintaks ang promedyong 1.71 na nasa mababa at nangangahulugang hindi mahusay.

Kung susuriin, natuklasang may kahirapan ang mga guro sa Sintaks, subalit nagiging maparaan pa rin ang mga guro sa Filipino sa pamamagitan ng kanilang madalas na pagsisikap tungo sa pagpapayaman ng kaalaman sa Gramatika ng mga mag-aaral gayundin sa pagpapataas ng kanilang kakayahan sa Gramatika. Dahil dito, may mga pangangailangan ang mga guro upang matugunan ang kanilang pangangailangan sa pagtuturo ng asignatura.

Ibig sabihin, ito ay nangangahulugang lubos na kailangan ng mga guro ang paglinang sa kanilang kakayahan upang maibigay sa mga mag-aaral ang kanilang pangangailangan maging ang karapatan nila na magkaroon ng kalidad na edukasyon.

Naihayag ng mananaliksik na ang kongklusyon na ang mga guro sa Filipino ng mga paaralan sa ika-7 klaster ay may katamtamang husay na kakayahan sa Gramatika. Pinatutunayan lamang nito na kahit sinong mga guro sa Filipino, medyor man o hindi ay maaaring mataas ang kakayahan ngunit ‘di maiiiwasang makaranas ng suliranin sa gramatika. Sa kabila man ng kahirapan nila sa Sintaks, nagiging maparaan sila at madalas na nagsisikap upang matugunan ang kaalamang panggramatika ng kanilang mga mag-aaral.

Dahil dito, lubhang kailangan nila ang mga nailahad sa talatanungan upang mapataas ang kanilang kakayahan sa Gramatika na magagamit nila sa paguturo ng Filipino.

Bilang tugon, iminumungkahi na mabigyan ng kaukulang palihan at mga pagsasanay ang mga guro ukol sa Gramatikang Filipino at ng mga modyul na magsisilbing gabay ng guro sa kanyang pagtuturo nito.

Nawa’y linangin pa ang kakayahan sa Gramatika ng mga guro sa bahaging sintaks upang mapataas ang kanilang antas ng kakayahan at mapayaman ang kaalamang sa Gramatika ng kanilang mga mag-aaral. Gayunman, paghusayan pa ang kakayahan sa morpolohiya at sa iba pang istruktura ng wika na hindi sakop ng nasabing pag-aaral.

*****

The author is Secondary School Teacher II at Sta. Maria High School M acabebe.