Ing e Asukad a Upaya ning Ginu (The Immeasurable Power of the Lord)
“Dagdag pa, O Ardyun, Aku ing bining talapalwal ding sablang bye.
Alang nanu mang— gagalo at e gagalo— a malyaring mye nung ala Ku.
O masikanang talasambut ding kasalang, alang kapupusan karing banal Kung kayaltawan. Ing asabi Ku na keka ditak mu kabud a kabaldugan ding kanakung alang kagisan a pibandyan.
Balwan mung ding sablang mangalagu, maligaya, at mangasikang lelangan sisibul manibat king ditak mung kislap ning Kanakung keslagan.
Dapot nanu ing pamangaylangan karin, Ardyun, kareng mabusising belwan?
King ditak mung dake ning Sarili Ku makalaganap Ku at sasaklung king metusikluban..”
~ Dalit ning Kakataskatasang Ginu? Dangka 10, Sunis 42
(The Song of God? Chapter 10: Verse 42)
*** Anting metung a talapagaral keng college king University of Sto. Tomas, dindam ku at asaksyan ing kakulangan kasalpantayanan na ning metung a talaturung Theology kanita. Ing sabi na, ing kanung pamandalakit da reng Israelitas keng Dead Sea (Mete Dagat) e ya sukat tanggapan anting lubus a katutwan. Ya pin ita ing pamanyagsag nang Moyses keng dagat kapamilatan ning tukud na a pigkaluban nang upaya ning Ginu. E ya kanu literal. Ing kanung Mete Dagat atin yang mekad tana-tanaman keng libutad at karin la dinalan at antita lang mekadalakit di Moyses at ding Israelitas kaybat dang tekasan ing Eyiptu.
Mangabaldugan a ya anting metung a professor ning Theology a tuturu keng metung a pamantasang Katoliku e na panwalan ing tuturu na. Yang mumunang dapat manwala keng laman ning Biblya a dalerayan ning kasalpantayanang Romanung Katolikung Kristyanu.
Metung yang alimbawa ita king kakulangan da kapanaligan ding dakal a taung mesabing Kristyanu king upaya ning Apung Ginu?a king Dyos alang e malyari king nanu mang kaburyan na. E tamu agyung sukdan ing upaya ning Dyos king nanu mang makalabwad a paralan uling anting pekamayupaya?nanu man ing buri nang malyari malilyaring alang sala. Agyang e ya mamalis keng dane na o agyang e ya kikimut. Kabud binuryan na saguli malyari na.
E ta Ya kalupa upaya at sikanan uling ita bala yambing ta la ding sinag ning aldo king aldo. Ing sinag ning aldo manibatan king aldo dapot ing aldo e ya manibatan karing sinag na. O bala yambing ta la ring butil ding balas king maragul a bunduk o ing kapisik a danum ning dagat king mabilug a dagat. Maragul ing pamiyaliwa. E man sukat iyambing.
Makanyan man, itamu malyari tamung iyambing king Dyos nung ing uri o quality ing pisasabyan. Ing Dyos at itamu diwa tamu o spiritual entities. Ing pamiyaliwa ing dekalan o quantity at pasibayu bala iyambing la ring butil ning balas king bunduk o kapisik a danum king dagat keng dagat. Maragul at marayu ing pamiyaliwa.