IPONG PERA SA PANAHON NG PANDEMYA
Mylyn T. Martin
Ako’y nakapagtanto sa ganitong panahon na mahalaga din pala ang pera. Sa hirap ng buhay, ikaw ay mapalad kung mayaman ka. Gastos doon, gastos dito na walang pinoproblema. Ngunit naisip mo ba hanggang kailan mo kayang gumasta? Di ka ba mauubusan kung ito ang nakagawian? Alalahanain natin ang isang kwento tungkol sa mga langgam. Naalala ko pa nung ito’y ikinuwento ng aking guro. “Ang mga langgam pala bago magtag-ulan ay handa na. Bakit at kung paano nila nagawa ito? Sa simpleng pamamaraan ng “pag-iipon”. Silay nag-iipon o nag-iimbak ng kanilang pagkain habang maganda pa ang panahon. At kapag sila’y nakarami na patuloy pa din sa pag-iipon ng makakain. Hanggang sa pagdating ng tag-ulan, silang lahat ay handa na. Puno ng pagkain ang kanilang tirahan.” Kaya kahit na sila’y mamahinga sa pag-iipon ng pagkain kung tag-ulan na, sila’y di na magugutom pa, dahil sa paghahandang nagawa. Tayo naman kaya? Kaya ba natin ang halintulad sa kanilang ginawa? Kung atin silang tutularan, sa pagdating ng kagipitan, di tayo mahihirapan. Kaya habang may panahon, mag-imbak o mag-ipon ng hanggang sa makakayanan. Dahil sa panahon na ika’y tumanda na, gustuhin mo man at mahina na ang katawan, paano mo pa makakaya? Kaya’t habang may panahon ka pa, mag-isip paano ka makaipon ng pera o ‘wag sayangin ang mga panahon na mahalaga. O kung may mga ari-arian na balang-araw ay may malaki kang pakinabang sa iyong naipundar. Lalo na sa panahon ng pandemya hindi ba’t tayo’y nakapag-isip na? At higit sa lahat ang mag-ipon ng pera? Pwede kaya nating tularan ang mga langgam sa kanilang pagsisikap upang makaipon? Di naman sinasabing paalipin sa pera o mga ari-arian bagkus gamitin ang mga ito ng tama at naaayon sa pangangailangan. Kung may panahon na makatulong pa sa iba, sa iyong kapwa, kapatid, magulang o sa mga higit na nangangailangan. Di lamang sarili ang isipin kundi pati narin ang iba. Kaya napakahalaga ng “Ipon Mong Pera” na sa mabuti nakatalaga.
--oOo-
The author is Master Teacher I at M. Nepomuceno Elementary School, Angeles City