Ing Pekamayap a Salamin ya pin ing Lumang Kakaluguran

Metung a

“Makagawa kang bayu dapot e ka makagawang lumang kakaluguran.”

~ Tom Bodett

“Ing pamakisabi king lumang kakaluguran apapaisip na nung makananu nang migbayu ing bye mu.”

~ E Mekilalang Talasulat

“Ing metung a lumang kakaluguran king marayung bangsa mengari yang uran kaybat ning langi.”

~ Diparang Isik

“Ing pamanagmu king lumang kakaluguran mengaring pamanagmu king mebating a pibandyan.”

~ Anthony Douglas Williams

“King imalan, ing pekabayu yang mekamasampat; karing kakaluguran, ing pekaluma yang pekamayap.” ~ Diparan Koreanu

“Tandanan a ding pekamal diling kasangkapang luma ila pin ding makamal a kakalugurang luma.”

~ H. Jackson Brown, Jr.

“Ing tune kakaluguran ya pin ing metung a lalakad lub kabang ing mabilug a yatu lalakad yang padayu.”

~ Walter Winchell

“Metung yang kalam da ring lumang kakaluguran ing agyu mung maging bolang neng abe mu la.”

~Ralph Waldo Emerson

“Mengari karing kapalyaryan ding alak a lakwas mipapakayap king kelambatan, ding pekalumang pamikaluguran ilang sukat pekamagkalub tula.” ~ Cicero

“Pekamasampat ing mikakakaluguran kang makalaut,

Kesa king bayung kakaluguran a magpakutang king masabal mu.” ~ Shanna Rodriguez

“Ding lumang kakaluguran dakila lang kalam karing tawling banwa ning ninu man…

Atin lang patas a panalala karing patas a mengapalyari at atin lang wangis a kabilyan ning pamisip.”

~ Horace Walpole

“E ta la lalakwan ding lumang kakaluguran; uling ding bayu e da la apantayan.

Ing bayung kakaluguran mengari yang bayung alak; ampat meluma na ya, ainum mu iting makiligaya.” ~ Talapanaral?Dangka 9: Sunis10

Atin kang kakaluguran kanitang minuna, king kayanakan yu pa a malambat mung e akatagmu lub ning makabang panaun at ngeni mu pa akatagmu, akasabi at akayabe pasibayu. Mekad king Facebook at pauli niti daig na pa ing aping milablab at migbaya pauli ning ligaya ning pamikit yung pasibayu.

Kanita e kayu man antita kalapit king balang metung. Mipalkarine kayu pa agyang migalamanu mu. Agyang mipaglalawe mung mata king mata e yu agawa nu man katalik ing pamikaluguran yu. Mapalyaring pauli ning kayanakan

yu pa kanita inya antita. Ditak pa ing denasan yung kapalyaryan king mapilan yu pamung banwa keti king yatu inya pin antita.

Karas ning mapilang pulumbanwa mikit kayung pasibayu agyang ken mung Facebook at kaybat ding e mu abilang karing taliring pamagbayu king bye yu. E na kayu anak. Metwa na kayu at dakal nang mebating a bage sadya maulaga o alang ulaga keka at karela kanita dapot ngeni mibaligtad. Ding sadyang maulaga kanita ala na lang ulaga ngeni at ding sadyang alang ulaga maulaga na la ngeni.

Pauli da ring lumang kakaluguran mibabalik ing milabas a keraklan akalingwan mu na at ngeni uli da kakablas manibatan karela ing sarili mu nung makananu ka kanita at nung makananu ka ngeni. Mekad ala kang sikan lub kanita. Galgau ka. Dakal ka kakatakutan. Pauli da, metapang na ka ngeni at ala na kang kakatakutan a dakal. Ala na kang unabis kakatakutan nung e mu ing magdili-dili?inya pin sa ila ring santungan mu a sasandalan kabud detangan na ka ning pamangulila.

Mamantabe la keka karing penandit a mangylangan kang kadame o agyang metung mung malyaring makirandam karing panamdaman mu malungkut la man o masaya. At ika naman anti ka naman kanita karela agyang e yu man pisabyan. Agyang e mu man anyaran. Magi lang pago malyari mung sandalan. Mekad uling patas kayu kapanaligan agya mang e patas kalalam ing kapanaligang ita.

Asasalamin mu ing sarili mu karing kakaluguran?luma la man o bayu..

Dake Talabaldugan: mikukumpa (pangdiwa) kukumpa, mipapaldan a sakit, sasalesekabilyan a sadyang magulu. English – illness or disease heals or improves; a bad situation gets better or improves a lot. Alimbawa king pamangamit: “Mengari lang pusang mipaglampung ding mipalsinta atagmwan dang mikukumul keng gulutan ning metunga lumang kubu keng taldawa.”

mikukumpari (pangdiwa) adwa o migit pang lalaking mikakaluguran o meging inanak ding anak ning balang metung. English – men who are buddy-buddies; men who made each other godfather of each of other’s child. Alimbawa king pamangamit: “Agad lang mesalese agyang mipate-pate la reng mikukumpari uling matibe tagana ing karelang pamiyabe kanita pang baintau la pa.”

mikukumpul (pangdiwa) mipagkumpul; dakal a tau, kaladwan o bage kumpulkumpul. English – people or things in a huddle or bundled up altogether. Alimbawa king pamangamit: “Mikukumpul la reng dakal a makopa neng kapanaunan da inya e da nala binang paniglon deng makibandi at siping dang bale.”

mikukumul (pangdiwa) mipangumul; babai at lalaki o adwang taung mipaglambing asna kasiri. English – man and woman or two people in a romantic or vulgar embrace. Alimbawa king pamangamit: “Mengari lang pusang mipaglampung ding mipalsinta atagmwan dang mikukumul keng gulutan ning metunga lumang kubu keng taldawa.”

mikukupitan (pangdiwa) mipangupit; mangupit lati-lati karing balang metung. English – doing petty thievery against each other. Alimbawa king pamangamit: “Ilaila mung liwas-liwas magbante keng tinda ra?mikukupitan la pang mikakapatad..” MIYAWIG KABALDUGANG AMANU TAMU

Aplit – malyaring mangabaldugan ya namang gagad, marapal o pirapal. Agyang masasal o mandalas. manyamal o mambilis. Miyawig-awig la ngan buring sabyan at ditak mung ditak ing pamiyaliwa da. Makanyan man ing “aplit” atin yang samut a “makulit.” Itang ating taung aplit na kang gugulwan o sosoran uli ning alang patugut a pamangulit.

Gagad malyari yang aplit oneng ating gagad a taimik mu at e mangulit. Excited ya mu. Ing pirapal o marapal buri anng sabyan e ya makapanaya inya manaplit ya.

Ing masasal asne kaburing-kaburing ating gawan a kapad na ning taung masasal. Ing madalas malyaring e ya mangulit at e ya bubulad dapot masasal ya uling atin yang pakikwanan.

Ing manyamal mabilis nang gagawan ing sukat nang gawan at manyamal ya o mambilis ya bang atin yang dasan a buri nang apuntalan.

Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.