Guro Ako: Kahapon, Ngayon at sa Hinaharap
Charlotte Angelique M. Meneses
"Guro ka, kailangan mo makibagay!Guro ka, kailangan mong sumabay!" Sa makabagong panahon at pag-usbong ng teknolohiya nararapat lamang na makasabay ang bawat guro sa pagbabagong ating nararanasan, lalo na ngayon sa panahon ng pandemya. Hindi dapat maging hadlang ang ating nararanasang krisis upang hindi natin maipahatid ang dekalidad na edukasyon sa ating mga mag-aaral, bagkus ito dapat ay ating malagpasan upang patuloy nating magampanan ang ating pinangakong responsibilidad sa ating bayan.
Isa sa pangunahing katangian ng isang epektibong guro sa ika-21 siglo ay ang galing niya sa komunikasyon. Kinakailangan ito ng isang guro upang kanyang maipaliwanag ang kanyang mga ideya. Ngunit paano ito magiging posible? Sa panahon ngayon hindi na maaaring hindi maging “techque” ang mga guro. Kailangan may kaalaman na siya sa mga “Microsoft Offices” at mga iba’t ibang mga platform ng komunikasyon na mayroon tayo ngayon tulad ng “Googlemeet”, “Messenger” at “Zoom”.
Isa pang katangian na dapat taglayin ng isang makabagong guro ay ang malawak na kaalaman na kanyang ibabahagi sa kanyang mga estudyante. Kaalaman na kanilang magagamit hindi lamang sa loob ng paaralan pati na rin sa kanilang magiging buhay bilang isang propesyonal. Wika nga ni Dylan Williams, “Ang tanging dahilan upang magkaroon ng ganap na progreso ang isang estudyante ay ang mataas na kalidad ng talino nang kanyang guro.
Ngunit kahit na tayo’y nasa makabagong panahon na, mayroong katangiang taglay ang mga makalumang guro na dapat pa rin nating taglayin. Ito ay ang pagkakaroon ng mataas o positibong personalidad na kung saan sila ay umaasang lahat ng kanyang mga estudyante ay magsisikap at gustong matuto. Sila ay kanyang kinikilala sa kanilang iba’t ibang yugto ng kanilang abilidad at katangian. Siya rin ay naniniwala na ang kanyang mga estudyante ay matututo at makakamit ang tunay na progreso sa bawat taon na kanilang pagdadaanan. Saludo sa lahat ng mga gurong ginagawa ang kanilang resposibilidad. Pagbati sa lahat ng mga mag-aaral na may pangarap. Tayo ay magkaagapay sa lahat ng hamon ng buhay. Propesyon ko ito, sinumpaan at pinangako! Guro ako: kahapon, ngayon at sa hinaharap.
The author
is Teacher
--oOo-
II at Pulung Santol National High School