Dagok at Solusyon sa Gitna ng Pandemya: Pag-aaral mula sa Bahay

Liezl M. Pactao-in

Ang edukasyon ang gabay para sa ating tagumpay. Ito ang laging naririnig sa mga matatanda, nababasa sa libro o kaya na obserbahan sa karamihan. Ngunit, sa hindi inaasahang pangyayari, umusbong ang isang hindi pangkaraniwang sakit na humantong sa isang pandemya. Nagdulot ito ng pagkabahala at takot sa mga tao, at nagdulot din ng malaking epekto sa ating lipunan, kalusugan at higit lalo sa edukasyon.

Bago pa man ang Covid-19 ay ramdam na ang paghihirap sa pag-aaral sa ating bansa. Sa pagdating ng pandemyang ito, nagbago ang pag-aaral ng mga bata na dapat ay nasa paaralan ngayon ay sa bahay na lamang isinagawa. Ito rin ay malaking problema para sa magulang sapagkat may mga gawain rin sila na ginagawa sa bahay at ang iba naman ay abala sa paghahanap-buhay kung kaya’t hindi nila natutukan ang kanilang mga anak sa pag-aaral.

Sa kabilang banda, hindi lamang ang mga mag-aaral at magulang ang nahihirapan sa sitwasyon ngayon. Maging ang mga guro ay nahihirapan din dahil sa karagdagang gawain katulad ng paggawa ng mga modyul at pagsubaybay sa pag-unlad ng mga mag-aaral. Masakit isipin ang katotohanan na maraming mga bata ang mapagiiwanan at hindi lubusan makapag-aral nang maayos. Bagaman nakakalungkot, hindi ito ang panahon para huminto sa pag-aaral.

Sa kasalukuyan, patuloy ang paghahanda ng mga pampubliko at pribadong paaralan sa pagharap sa nalalapit na pasukan sa pamamagitan ng pagsasagawa ng mga workshops, at trainings partikular na sa mga isasagawang Learning Delivery Modalities tulad ng Distance Learning at Blended Learning.

Sa kabila ng banta ng pandemya ay marami pa rin ang nangangarap na mga estudyante na balang araw ay maibalik na sa dating pisikal ang pag-aaral. Tumaas ang pag-asa ng karamihan na muling makadalo sa pisikal na klase kasabay ng pagtaas ng mga nabakunahang guro at mag-aaral. Mas magiging posible ang pagsisimula ng face-to-face classes at magiging ligtas muli ang pagpasok sa paaralan.

Ang muling pagbubukas ng pisikal na klase ay isa ring hakbang ng bansa para sa pagbangon mula sa pandemyang ito. Sa panahon ng pandemya, ang pagsisikap na makapagbigay ng dekalidad na edukasyon para sa mga kabataang Pilipino sa gitna ng ating nararanasan ay mahalagang isaalang-alang habang pinapanatili ang kaligtasan at kalusugan ng mga guro at mag-aaral.

--oOo-

The author is Secondary School Teacher-III at Igpit National High School, Schools Division of Digos City, Region XI-Davao Region