Mga kandidatong alkalde sa bayan ng Pampanga

Naisulat ko na itong inyong mababasa. Hindi ko lang maalala kung kailan. Pero laging ang paksang ito ay napapanahon tuwing ganitong nalalapit ang eleksyon. Ano ba ang mayroon sa pulitika na may magkatunggali na ubusan ng pera para lang magtapumpay sa inaasam niyang katungkulan? Minsan naiisip siguro ng marami nating kababayan na ano ba ang mayroon sa panunungkulan at bakit at hindi maiwa-iwanan ang katungkulan at binabalikbalikan. Hanggang sa magkakamot lang ng ulo dahil mahirap matarok talaga kung ano ang layunin ng bawat isa sa atin.

Sa pagtatalo ng mga magkakaibigan lilitaw ang mga argumentong na kung bakit ang isang kandidato halimbawa sa pagka-alkalde o congressman ay tutustusan ang kampanya ng daang milyon piso, eh samantalang ang kaniyang sweldo ay kakarampot lang kung ihahambing sa nagastos noong kampanya. Ang karamihang konklusion ng pagtatalo ay ang kandidatong gumastos ng limpak limpak ay babawi at magnanakaw sa kaban ng bayan pag nahalal.May ganoon, pero hindi po pwedeng lahatin ang mga kandidato. Mayroon na nasa dugo na lang at sa puso ang paglilingkod sa bayan. Mayroon naman, parang negosyo ang tingin nila sa pulitika.

Baka sa umpisa pa lang bawi na si kandidato. Maraming kaibigan, kamaganakan at taga-suporta. Mga taga suportang may interes na pinoproteksiyonan. Heto iyong pinangagalingan ng mga kontribusyon. Hindi po lahat ng gastos ay galing sa bulsa ng kandidato, lalo na maganda ang resulta ng survey para sa kaniya. At kokonti rin naman ang gastos ng isang kandidato kung ito'y kilala na at napupusuan siya ng bayan.

Hindi sukat magastos ang halalan. Kung mga tarpolina lang at ilang mga flyers na pinamimigay sa mga botante ay hindi masyadong mabigat sa bulsa ni kandidato. Ang mabigat sa bulsa ay iyong mga ilang botanteng sinasamantala ang pagkakataon, na hingi na hingi kung ano ano. Pasayaw, bomba ng tubig, palaro sa basketbol, nasirang bakod, abuloy sa pinagagawang bisitas at kung ano ano pa. Ang kawawang kandidato ay hindi pwedeng tumanggi. Iyan naman ay totoo lang sa mga ilang lugar, at hindi naman sa lahat.

*****

Siyanga pala dito sa atin sa lalawigan ng Pampanga marami ang dating na nanungkulan ay lalahok sa darating na eleksiyon. Ang magkapatid na si Bobong Flores at Annette F. Balgan ay muling maghaharap sa pagka-alkalde. Si Mayor Dan Guinto sa Masantol ay naka-tatlong termino na. Ang kapatid na si Homer ang isasabak laban naman sa anak ni Party List Representative Bart Bustos.

Si Alkalde Teddy Tumang ay nagnanais na manatili sa munisipyo at makakaharap ang dating Mayor Ernesto Punzalan at Vice Mayor Jonathan Pangan. Si Alkalde Mayor Bon Alejandrino ng Arayat ay naka tatlong termino at ikakandidato ang asawang si Madeth at haharapin sila Marlon Balagtas at Pogi Mallari.

Sa bayan ng Porac maghaharap si Mayor Jing Capil at ang gustong bumalik na dating Mayor Carling de la Cruz. Sa Mabalacat City, 3-cornered fight ang laban sa pamamagitan

nila Mayor Cris Garbo, dating Mayor Boking Morales at Deng Pangilinan na dating chairman ng Mabalacat Water District. Samantalang sa Lungsod San Fernando karambola sila Vilma Caluag, Rosve Henson, Jimmy Lazatin at Oscar Rodriguez. Sa bayan ng Sta Ana haharapin ng kasalukuyang Alkalde Ross Gamboa si Vice Mayor Reinhart Guevarra at ang Abogado Dennis Pangan. Si Aniway Baylon ang haharap kay Mayor Rene Maglanque sa Candaba. Sa ibang pagkakataon naman ang mga iba pang kumakandidato.