Tubig ay buhay

Ang bayan ng Floridablanca sa Pampanga ay mayroong 33 barangay na nasasakupan at dalawa sa mga barangay nito ay matatagpuan sa kabundukan: ang barangay Nabuclod at Mawacat kung saan nakatira ang mga kapatid nating Aeta.

Ang Barangay Mawacat ay halos may 16 na kilometro ang layo mula sa munisipyo ng Floridablanca at aabot ng halos isang oras ang biyahe bago makarating dito.

Ang nasabing barangay ay isa sa mga lugar na mahirap marating lalo na sa panahon ng tag-ulan.

Hanggang ngayon ay hindi pa sementado ang daan at tumatawid pa ng dalawang ilog ang mga tao bago marating ang pinakasentro nito.

Sa panahon ng tag-ulan, kapag tumaas na ang tubig sa mga nasabing ilog ay hindi na makakababa ang mga kapatid na Aeta papuntang kabayanan upang makapagtinda ng kanilang mga pr odukt o.

Sa hindi maayos na daraanan, halos kakaunti ang nakararating na tulong sa kinaroroonan ng ating mga kapatid na Aeta.

Dahil sa limitadong tulong na nakakarating mula sa pamahalaan, naiisip ng mga kababayan nating katutubo na hindi sila nasusuportahan ng ating gobyerno.

Sa pamamagitan ng 5th Fighter Wing ng Philippine Air Force (PAF), bumuo ng CMO Intervention Team (PAFCIT) upang mapuntahan ng mga sundalo ang nasabing barangay.

Sa pamamagitan ng pakikipagpulong ng 5FW, naibahagi ng mga katutubo ang kanilang mga suliranin at mga pangangailangan.

Isa sa suliranin ay ang mapagkukunan ng malinis at maiinom na tubig na gagamitin sa kanilang pang-araw-araw na pamumuhay.

Naibahagi ng mga katutubo na may sibol o bukal ng tubig sa Sitio Tirya, Barangay Mawacat na maaring mapagkunan ng malinis na tubig.

Kung maisasaayos ang sinasabing sibol at makapagpapatayo ng tangke ng tubig, malaking tulong ito para sa kanila upang may sapat na mapagkunan ng tubig.

Nakipag-ugnayan at inilapit ng kasundaluhan ng 5th FW ang suliraning ito kay Engineer Inla Diana C Salonga ng Don Honorio Ventura State University DHVSU.

Dahil dito, agad silang nagsagawa ng pagsusuri at pag-aaral sa nabanggit na sibol upang matukoy kung sapat ba ang tubig ng para matugunan ang pangangailangan ng 75 na pamilya sa Mawacat.

Ang DHVSU ay nagsagawa na ng mga proyekto para sa mga kapatid nating Aeta.

Ang pamantasan ay katuwang ng

Philippine Air Force sa pagtataguyod ng adhikain ng National Task Force to End Local Communist and Armed Conflict (NTF-ELCAC).

Kaugnay nito, ang dalawang ahensya ay ipagpapatuloy ang naturang gawain para sa ikabubuti ng nasabing pamayanan.

Nitong Ika-tatlo ng Marso, nagkaroon ng pagpupulong sa Munisipalidad ng Floridablanca.

Pinangunahan ito ng Munisipyo ng Floridablanca na nangangasiwa sa kalusugan.

Kasama ang Unibersidad ng Pilipinas (UP), Manila Campus sa pagtalakay sa mga suliranin sa Baranggay Mawacat.

Napagalaman na ayon sa pag-aaral at datos na mula sa munisipyo na nagangasiwa sa kalusugan at ng nasabing unibersidad, iba’t ibang uri ng sakit ang nagiging resulta ng kawalan ng maayos na palikuran at pangunahing mapagkukunan ng tubig.

Kabilang dito ang iba’t ibang uri ng bulate na laganap sa mga pamayanan na tulad ng Mawacat.

Layunin ng pagpupulong na maibsan ang kalagayan ng ating mga Aeta sa naturang lugar sa pamamagitan ng siyentipikong pagaaral at pagtutulungan ng mga ahensya ng gobyerno at pribadong sector.

Nawa ay magtagumpay ang grupong ito sa kanilang layunin.

-- By the Office of the Civil-Military Operations, 5th Fighter Wing.