NAGHIGOT, MIAMBAK

Lalake naghikog kay wa kaaguwanta sa pagbiya sa iyang kapuyo

LALAKENG wa baliki sa iyang kapuyo kay palahubog nagpakamatay sa punoan sa nangka pinaagi sa paghigot og pisi sa iyang liog dayon miambak sa miaging gabii sa Sitio Lamac, Barangay Talavera, dakbayan sa Toledo.

Si Dennis Cavan, 39, ulitawo, mag-uuma, lumad nga taga lungsod sa Sibonga kaging na dihang nakitan sa iyang silingan nga nagbitay sa punoan sa nangka pipila ka metros ang gilay-on sa iyang payag.

Si SPO1 Thule Tahadlangit, imbestigador sa Toledo Police nga nahinabi sa Sun.star Superbalita niingon nga naguol si Cavan kay wa makig-uli kaniya ang kanhi kapuyo nga si Ponciana Cañada, 43, dunay lima ka anak sa iyang kanhi bana.

Niadtong miaging gabii hubog si Cavan dihang nasuroy usab ang iyang kanhi kapuyo sa pikas sitio diin magpuyo ang iyaan niini. Silang duha nagkatagbo sa dalan. Tungod niini nidiskarte gilayon siya sa babaye nga mag-uli sila sa maayong kabubut-on ug mobalik sa ilang gipuy-an sa Sitio Lamac.

Apan hugot na ang barauganan sa babaye nga di na gyud makig-uli kaniya tungod sa kinaiya niini nga kon mahubog gub-on ang pbalay ingon man pangtigbason ang bongbong.

Ang duha gikatahong nagkatipon sulod sa usa ka tuig ug tunga sa wa pa sila magkabuwag niadtong miaging tuig kay nilarga si Cañada aron mangitag trabaho sa dakbayan sa Talisay.

Si Cavan, kinsa mipadayag sa iyang grabing gugma sa kanhi kapuyo, nagmasulob-on ug nagsigeg handom nga mobalik na kini sa ilang balay.

Nihulga siya ngadto sa iyang kabanay ug kang Cañada nga kon di gyud makig-uli kaniya, magpakamatay siya.

“Sige siyag hangyo nga magbalik sila pero wala mosugot si Ponciana. Sa kaguol niya mipadayag nga sige lang kay magdupa si Kristo ugma ug mibahad nga magpakamatay gyud kon dili mopauli ang kanhi kapuyo sa ilang panimalay,” dugang ni Tahadlangit.

Gipadayag niya nga makadaghan nang higayon nga gitambagan sa pamilya sa babaye si Cavan nga mopauli na lang sa lungsod sa Sibonga sanglit di na gyud makiguli si Ponciana kaniya kay nahadlok og maayo sa mga gihimo niini kon mahubog.

Apan ni-insister kini nga di siya mopauli hangtod di niya madala sa pagbalik sa ilang lugar si Ponciana, nga maoy gusto sa iyang inahan.