FRENCH NATIONAL HAPIT NA MADUGTA

HAPIT na madugta ang lawas sa usa ka French national nga napalgang patay sulod sa iyang lawak sa usa ka resort sa dakbayan sa Lapu-lapu.

Mga lagong nga nangagi sa gingi sa iyang lawak maoy nakadapit sa pagtagad sa mga staff sa pagsusi sa nahimutangan ni Jean Marc Stephane Brockes, 41, ulitawo, kasamtangang nagpuyo sa Brgy. Bangkal, dakbayan sa Lapu-lapu.

Mga imbestigador sa Crime Against Person’s Desk (CAPD) sa Lapu-lapu City Police Office naglibog kon unsay naka-ingon sa kamatayon ni Brockes, nga ilang naabtan nga nahushos ang shorts ug naggahi pa ang kinatawo niini.

Base sa spot report sa CAPD nga ilang nadawat ang alarma niadtong Huwebes sa alas 5:30 sa hapon kalabot sa usa ka lang- yaw nga napalgan nga patay sud sa iyang lawak sa North Point Management Resort nga nahimutang sa Sitio Mangal, barangay Punta Engano.

Sa gihimo nga imbestigasyon ni SP01 Manolito Abellanosa sigun sa asoy sa mga kawani sa resort nga katapusang nakit-an si Brockes niadtong bisperas sa Pasko.

Ang security guard sa maong establisemento nga si Jovert Andawi nisaysay nga miabot si Brockes uban sa usa ka lalake nga nitabang og bitbit sa iyang bag.

Igo nga nitungod sa ganghaan sa resort nibiya ra usab ang maong Lalake ug maoy katapusang higayon nga nakit-ang buhi si Brockes.

Nasayran nga ang maong langyaw nakapalit og unit sa North Point Management Resort.